Վարչապետ Հովիկ Աբրահամյանի՝ Գյումրի կատարած այցից հետո որոշում կայացվեց, Գյումրիի անօթևան 430 ընտանիքների համար Մուշ 2 թաղամասում շենքեր կառուցելու փոխարեն, ընտանիքներին տրամադրել բնակարանների գնման վկայագրեր: Այսինքն՝ կառավարությունը պետք է համապատասխան գումար հատկացնի ընտանիքներին բնակարան ձեռք բերելու համար, և այդպիսով տասնամյակներ ձգվող հարցը կհամարվի փակված: Այս որոշման մասին տեղեկությունը վերահաստատեց նաև քաղաքաշինության նախարար Նարեկ Սարգսյանն իր 100-օրյա ամփոփիչ ասուլիսում: «Գյումրիում ներկա պահին վաճառքի համար առկա են բազմաթիվ բնակարաններ և ավելի ճիշտ է գնել այդ բնակարանները, աշխուժացնել քաղաքի շուկան, քան նորից շենքեր կառուցել»,- ասել էր Նարեկ Սարգսյանը՝ հավելելով, որ բնակիչների աջակցության այս ծրագրի բոլոր պարամետրերը պատրաստ են և գյուղական վայրերում, և քաղաքում:
Քաղաքաշինության նախարարը վստահեցրեց նաև, որ անօթևանների 2/3-րդ կողմ է բնակարանների գնման վկայագրերի այս տարբերակին: Ինչ վերաբերում է այդ ընտանիքների մտահոգություններին՝ կապված բնակարանների համար անհրաժեշտ գումարի չափի հետ, Նարեկ Սարգսյանն ասել էր. «Մենք կադաստրից հարցումներ ենք անելու բնակարանների ճիշտ շուկայական արժեքները, և այդ արժեքներին համապատասխան իրենք կստանան այդ վկայագրերը»:
Եվ Հովիկ Աբրահամյանի Գյումարի կատարած այցից, և քաղաքաշինության նախարար Նարեկ Սարգսյանի ասուլիսից բավական ժամանակ է անցել, սակայն որևէ տեղաշարժ ԲԳՎ-ների տրամադրման հարցում չկա: Անգամ այդ ուղղությամբ դեռևս կառավարության որոշում չկա:
«Ասում, ասում են, բայց ոչ մի բանից էլ տեղյակ չենք: Ո՞ւր են էդ վկայագրերը, թող բերեն, աչքներս մտցնեն: Մենակ խոսում են: Ոչ մեկս էլ ծանոթ չի դրա պայմաներին, ոչ մեկս էլ չգիտի, թե ինչքան փող են տալու»,- «Առաջին լրատվական»-ի հետ զրույցում ասաց բնակարան փափագող ընտանիքներից մեկի հայրը:
«Դա ընդամենը տրամադրությունների շոշափման խնդիր էր: Անգամ օրեր առաջ, երբ Սերժ Սարգսյանը եկավ Գյումրի, ոչ մի բառ չասաց ԲԳՎ-ների ծրագրի ճակատագրի մասին: Բոլորը խոսում են այդ ծրագրից, բայց ոչ ոք չգիտի՝ դա ինչ է և ինչ պայմաններ ունի: Օրական 100 զանգ ենք ստանում նույն հարցով»,- «Առաջին լրատվական»-ի հետ զրույցում ասաց Գյումրիի «Շիրակ» կենտրոնի նախագահ Վահան Թումասյանը: Նրա խոսքով՝ ԲԳՎ-ների մասին խոսակցույթունները շրջանառության մեջ դնելով՝ կառավարությունը պարզապես ժամանակ շահեց, քանի որ քաջ գիտակցում էր, որ այդ բնակարանների շինարարությունը երբեք էլ չի շարունակվելու:
«Նախ ասեմ, որ 430 ազատ բնակարան կառավարությունը առաջիկա 100 տարում էլ Գյումրիում չի գտնի, ու տեսեք՝ ինչ կլինի: Մոտավորապես մի 50-60 հոգի կվերցնի այդ ԲԳՎ-ները: Եվ ծրագիրը մոտ 30 տոկոսով կհամարվի արդյունք տված: Մյուս մասը, որն, այնուամենայնիվ, ինչ-որ տեղ ունեն բնակվելու, ԲԳՎ-ների գումարները ինչ-որ միջոցով կհանի և կլուծի իր մյուս խնդիրները, կամ պարզապես կարտագաղթի Գյումրիից ու Հայաստանից առհասարակ: Իսկ մի մասն էլ պարզապես կգնա կեղծ գործարքների՝ գումարը կհանի, կծախսի այլ նպատակներով: Շատ ստիպելու դեպքում էլ տնակը կքանդի, տարածքը կազատի ու կգնա վարձով կապրի: Բացի այդ, մինչ այս ինչքան էլ որ կիրառվել է ԲԳՎ-ները, բոլորն էլ տարել և հետ են տվել դրանք»,- նկատեց Թումասյանը:
Մեր զրուցակցի խոսքով, Աստված չանի, բայց այս ծրագիրը ևս կարժանանա նախորդի ճակատագրին: Սա կարող էր հաջողություն ունենալ միայն այն պարագայում, երբ պետությունը, կառավարությունն ինքը գներ անհրաժեշտ բնակարաններն ու տրամադրեր: Կամ գոնե ֆիքսված գին սահմաներ 1, 2 և 3 սենյականոց բնակարանների համար, որպեսզի ծրագրի հաստատումից հետո բնակարանների գինը կտրուկ չաճեր Գյումրիում: «Բայց քանի որ այդպես չի լինելու, ապա պետությունը կորոշի, որ ավելի նպատակահարմար է շինարարություն անելը, և առաջիկա մի 20-25 տարին կզբաղվեն աղետի գոտում անօթևաններին բնակարաններով ապահովելու խնդրի լուծմամբ»,- ասաց Թումասյանը:
Նշենք, որ Նարեկ Սարգսյանն իր ասուլիսի ժամանակ նաև ասել էր, որ եթե լինեն մարդիկ, ովքեր դեմ կլինեն ԲԳՎ եղանակով բնակարան ձեռք բերելուն, ապա իրենք շինարարության հնարավորություն էլ ունեն: Ինչն առնվազն զավեշտալի է: Եթե պետությունը ունի շինարարության հնարավորություն, ապա ինչո՞ւ տարիներ շարունակ այդպես էլ չի իրականացնում և ավարտին չի հասցնում Մուշ 2 թաղամասի բնակարանաշինությունը, որը ՀՀ վերջին երկու նախագահների նախընտրական խոստումն էր:
