Սիրիայում մարդու իրավունքների հնարավոր խախտումների հետաքննության հարցերով ՄԱԿ-ի հանձնաժողովը պատմել է զանգվածային սպանությունների և այլ հանցագործությունների մասին, որոնք այդ երկրի տարածքում իրականացրել են «Իսլամական պետություն» ահաբեկչական խմբավորման ծայրահեղականները: Այս մասին հայտնում է ITAR-TASS-ը:
««Իսլամական պետությունը» զանգվածային մահապատիժներ է իրականացրել՝ ներառյալ Հոմսի արևելքում Շաար գազային դաշտերի շրջանում քաղաքացիական անձանց սպանությունները և հուլիսին ու օգոստոսին Ռաքքայում կառավարական ուժերի գերեվարված հարյուրավոր զինվորների մահապատիժը» ,- հանձաժողովի հերթական զեկույցը ներկայացնելով՝ ասել է դրա ղեկավար Պաուլու Սերժիու Պինեյրուն: «Ըստ ստացված հաղորդագրությունների՝ հարյուրավոր մարդիկ՝ շեյթադ ցեղից, սպանվել են Դեյր-էզ-Զորում»,- ավելացրել է նա:
«Այլ զինված խմբերի գերեվարված անդամների ևս մահապատժի են ենթարկում, իսկ նրանց մարմինները դնում ի տես հանրության»,- ասել է Պինեյրուն:
Իսլամիստների վերահսկողության տակ գտնվող տարածքներում ապրող մարդկանց մասին Պինեյրուն պատմել է, որ կանանց արգելված է առանց տղամարդու ուղեկցության դուրս գալ տնից, որոշ կանանց մահացու աստիճանի քարկոծել են՝ հավանաբար, դավաճանության համար: Աղջիկների համար դպրոցական կրթությունը վերացել է, աճում է դեպքերի թիվը, երբ նրանց բռնի ամուսնացնում են:
««Իսլամական պետությունը» երեխաներին միտումնավոր բռնության է ենթարկում»,- հայտնել է Պինեյրուն: Նրա խոսքով՝ երեխաներին ստիպում են ներկա լինել մահապատիժներին, նրանց սովորեցնում են զենքի հետ վարվել՝ ռազմական գործողություններին մասնակցելու համար:
