Ֆրանսիական Air France ավիաընկերության օդաչուներն արդեն երկու օր է՝ գործադուլ են անում: Հնարավոր է՝ գործադուլը տևի մինչև սեպտեմբերի 22-ը: Ամենայն հավանականությամբ՝ այս գործադուլը կլինի ամենախոշորը Air France-ի համար՝ 1998 թվականից ի վեր:
Ինչպես տեղեկացրել էինք, Air France-ն ունի 3760 օդաչու, որը գերազանցում է իր կարիքները: Պատճառն ամռանն ընդունված Perform 2020 զարգացման ծրագրի դրույթներն են, որոնք նախատեսում են օդաչուների մեծ խմբի տեղափոխման հնարավորություն Hop! տարածաշրջանային դուստր ձեռնարկություն և Air France-ի հոլանդական գործընկեր Transavia-ի տեղական մասնաճյուղ:
Օդաչուները թեև համաձայնել են տեղափոխվել, սակայն պահանջում են սոցիալական ապահովության մակարդակի և իրենց կարգավիճակի պահպանում՝ խուսափելու աշխատավարձերի հնարավոր կրճատումից, քանի որ նոր աշխատավայրում աշխատանքը սեզոնային բնույթ է կրելու: Պահանջներից մեկն էլ այն է, որ կրճատումներ չլինեն:
Air France-ը, որը Հայաստանի տարածքում այս ամիս իրականացնում է վեցօրյա թռիչքներ, հայտարարված գործադուլի պատճառով երեկ թռիչք չի իրականացրել: Վաղվա թռիչքը նույնպես հանվել է չվացուցակից:
Այսօրվա Փարիզ-Երևան թռիչքը չի կայացել, վաղվա թռիչքը հանված է, բայց ընկերությունը փորձում է Ֆրանսիա թռիչք կազմակերպել այլ ավիաուղիներով: Մյուս օրերի թռիչքների վերաբերյալ այս պահին ընկերությունում տեղեկություններ չկան:
Ի դեպ, գործադուլն ավիաընկերությանը օրական հասցնում է 10-15 մլն եվրոյի վնաս: Թեև Air France-ի ղեկավարությունը շարունակում է բանակցել արհմիությունների ներկայացուցիչների հետ, այնուամենայնիվ՝ այս պահին համաձայնության գալ չի հաջողվում:
