«Առաջին լրատվական»-ի զրուցակիցն է «Ժառանգություն» կուսակցության փոխնախագահ Արմեն Մարտիրոսյանը:
– Պարոն Մարտիրոսյան, առաջիկայում սպասվում է ոչ իշխանական չորս ուժերի համատեղ հանրահավաքը, որտեղ պետք է գնահատվի իշխանություններին ներկայացրած 12 պահանջների կատարման ընթացքը: Այդ հանրահավաքին անդրադարձ կլինի՞ իշխանությունների նախաձեռնած սահմանադրական փոփոխություններին:
– Դուք տեղյակ եք, որ այդ 12 պահանջների մեջ սահմանադրական փոփոխությունների հետ կապված առանձին կետ չկա: Բայց եթե առանձին քաղաքական ուժեր անհրաժեշտ համարեն դրա մասին էլ խոսել, դա արդեն իրենց խնդիրն է: Բացի այդ` հնարավոր է մինչ այդ հանրահավաքի օրը ճշտելու ժամանակ խորհրդարանական չորս ընդդիմադիր ուժերը նաև որոշեն, թե որն է լինելու ելույթների օլրակարգը և ինչ թեմաներ են հնչելու: Ուստի այս պահին այդ առումով որևէ որոշում դեռ չկա: Իսկ եթե օրակարգի շուրջ որոշում չլինի, յուրաքանչյուր քաղաքական ուժ, բնականաբար, առաջին հերթին կխոսի 12 կետերի մասին, հետո նոր՝ ըստ իր հայեցողության: Բայց կարծում եմ, չի բացառվում, որ խոսեն նաև սահմանադրական փոփոխությունների մասին:
– Այսինքն` հնարավոր է, որ քառյակի ուժերը համատեղ հանրահավաքի ժամանակ սահմանադրական փոփոխություններին չանդրադառնան այն պատճառով, որ այդ հարցն ընդգրկված չէ 12 կետերի մեջ:
– Այս պահին որևէ որոշում չկա, հանրահավաքի անցկացման օրն ու վայրը դեռևս որոշված չեն: Միանշանակ է, որ հանրահավաքը Երևանում է լինելու, բայց տեղյակ եք, որ նաև մարզային հանդիպումներ են նախատեսված, թեև դեռ որոշված չէ, թե որ քաղաքներ պետք է այցեր լինեն, և այդ հանդիպումների ժամանակ ինչ թեմաների շուրջ քննարկում լինի: Հաստատ է միայն այն, որ խոսելու են 12 կետերի մասին: Իսկ այս պահին կարելի է ասել, որ մենք ունենք քառյակի կողմից ընդունված երկու փաստաթուղթ: Մեկը իշխանություններին ներկայացրած 12 կետերի մասին հայտարարությունն է, մյուսն էլ այն առաջարկները, որը ներկայացվեց Հանրային ծառայությունները կարգավորող հանձնաժողովին էլեկտրաէներգիայի թանկացման հետ կապված: Ուրիշ այլ փաստաթուղթ դեռևս չկա: Եվ քանի դեռ որևէ այլ որոշում չկա, ես միանշանակ կարող եմ ասել, որ 12 կետերի և էլեկտրաէներգիայի հետ կապված քննարկումներ կլինեն: Իսկ երբ հավաքվեն հստակեցնելու քննարկման օրակարգն ու տեխնիկական հարցերը, այդ ժամանակ արդեն կորոշեն, թե սահմանադրական փոփոխությունների մասին կխոսվի, թե ոչ:
– Բայց չէ՞ որ սահմանադրական փոփոխությունների հարցը բավականին սկզբունքային ու կարևոր է քառյակից ՀԱԿ, «Բարգավաճ Հայաստան» և «Ժառանգություն» կուսակցությունների համար:
– Դրա համար էլ ասում եմ, որ հնարավոր է, որ դրա մասին էլ խոսենք, չասեցի, թե դա փակ թեմա է: Ես ընդամենն ասեցի, որ այս պահին օրակարգի հետ կապված կոնկրետ որևէ քննարկում չկա:
– Մյուս կողմից էլ ոչ իշխանական քառյակից Դաշնակցություն կուսակցությունը դեմ չէ սահմանադրական փոփոխություններին: Միաժամանակ նաև հայտարարում են, որ եթե իշխանություններն ընդունում են իրենց առաջարկները, իրենք կողմ կլինեն այդ փոփոխություններին: Այդ կուսակցությունից նաև հայտարարել են, թե իրենք չեն կարող մասնակցել ոչ իշխանական ուժերի մարզային այցելություններին, նաև հոկտեմբերին նախատեսված հանրահավաքին, եթե այնտեղ քառյակի մյուս ուժերը դեմ արտահայտվեն սահմանադրական բարեփոխումներին:
– Կարծում եմ, պետք չէ ժամանակից առաջ ընկնել: Նախ ՀՅԴ-ն մի փոքր այլ ձևակերպում է տալիս: Նրանք ասում են, որ իշխանությունները եթե չընդունեն իրենց առաջարկները, իրենք նույնպես դեմ կլինեն այդ փոփոխություններին: Իսկ այս պահին որևէ տեղեկություն չունենք այն մասին, թե իշխանություններն ընդունե՞լ են նրանց բոլոր առաջարկները, թե ոչ: Բացի այդ` սահմանադրական փոփոխությունները, լինելով կարևոր գործընթաց, քննարկվող թեմաներից մեկն է: Կան նաև բազմաթիվ այլ թեմաներ, որոնք ընդունվել են նույն ՀՅԴ-ի առաջարկով: Այնպես որ` կենտրոնանալ մի խնդրի շուրջ և այն դարձնել անկյունաքարային, կարծում եմ, այնքան էլ ճիշտ չէ: Առավել ևս, որ հասարակությունն ունի ավելի գլոբալ օրակարգ, դա արմատական իշխանափոխությունն է: Իրենց համար առաջնայինը դա է և ոչ թե սահմանադրական փոփոխությունները: Համենայնդեպս` մարդկանց հետ իմ հանդիպումները դա են ցույց տալիս:
– Սահմանադրական փոփոխություններին դեմ է արտահայտվել նաև վերջերս իրեն ընդդիմություն հռչակած «Օրինաց երկիր» կուսակցությունը: Հնարավո՞ր է այդ կուսակցությունը կամ քառյակից դուրս այլ ուժեր նույնպես հրավիրվեն առաջիկա ձեր հանրահավաքին:
– Այս պահին որևէ քննարկում այդ ուղղությամբ չկա, եթե հետագայում լինի, մենք հանրությանն այդ մասին կտեղեկացնենք:
Լուսանկարը՝ Pan Photo-ի
