Air France ավիաընկերության օդաչուները գործադուլ են սկսում: Ֆրանսիայում օդաչուների նման խոշոր գործադուլ, որը կարող է տևել մինչև սեպտեմբերի 22-ը, չի եղել 1998 թվականից ի վեր:
Air France-ի ղեկավարության պաշտոնական տվյալներով՝ երկրի օդանավակայաններում կապահովեն ընկերության չվերթների 48 տոկոսից ոչ ավելին:
Air France-ը մոտ 70 հազար SMS է ուղարկել այս շաբաթ ուղևորություն ծրագրած ուղևորներին՝ նրանց առաջարկելով թռիչքը տեղափոխել այլ օրեր:
Օդաչուներն այդ կերպ իրենց դժգոհությունն են արտահայտում այս տարվա ամռանն ընդունված Perform 2020 զարգացման ծրագրի դրույթներից: Այն նախատեսում է օդաչուների մեծ խմբի տեղափոխման հնարավորություն Hop! տարածաշրջանային դուստր ձեռնարկություն և Air France-ի հոլանդական գործընկեր Transavia-ի տեղական մասնաճյուղ:
Ներկայում Air France-ի օդաչուների թիվը (3760 մարդ) զգալիորեն գերազանցում է նրա կարիքները:
Օդաչուները համաձայնել են տեղափոխվել, սակայն պահանջում են սոցիալական ապահովության մակարդակի և իրենց կարգավիճակի պահպանում՝ վախենալով աշխատավարձերի կրճատումից՝ պայմանավորված նոր վայրում աշխատանքի սեզոնային բնույթի հետ: Նրանք պահանջում են նաև երաշխավորել, որ հեռացումներ չեն լինի:
