Վերջերս ընդդիմադիր դարձած «Օրինաց երկիր» խմբակցության ղեկավար Հեղինե Բիշարյանն այսօր Ազգային ժողովում տեղի ունեցած ճեպազրույցի ժամանակ հայտարարեց, որ ՕԵԿ հանրահավաքը կայացած էր՝ ավելի քան 6 հազար մարդ է մասնակցել:
«Ես, անկեղծ ասած, պետք է ասեմ, որ մեր հանրահավաքը կայացել է, մենք բարձրացրել ենք լուրջ խնդիր, որ հուզում է այստեղ նստած յուրաքանչյուրին. եթե մենք ձայներս կտրենք յուրաքանչյուր թանկացման ժամանակ, ապա էլ ավելի մեծ թվով ապրանքներ կթանկանան»:
Հեղինե Բիշարյանն ավելացրեց նաև, որ կուսակցության կազմակերպչական հարցերով ինքն է զբաղվում, և հանրահավաքին ավելի քան 6 հազար մարդ է մասնակցել, իսկ թե ինչու այլ քաղաքական ուժեր չեն մասնակցել՝ Բիշարյանը հորդորեց հարցնել հենց այդ ուժերին:
Ինչ վերաբերում է Սահմանադրական բարեփոխումների հայեցակարգին, «Օրինաց երկիրն» առայժմ հստակ դիրքորոշում չունի: Այդուհանդերձ՝ կուսակցության պատգամավոր Հովհաննես Մարգարյանն ասաց, որ այդ փոփոխությունները համարում է ժամանակավրեպ. «Մենք կարևորագույն խնդիրներ ունենք լուծելու, հիմա դեռ բովանդակությանը չենք անդրադառնում, մեր առջև ավելի մեծ խնդիրներ կան՝ սկսած արտագաղթից, մինչև գնաճ»:
Լուսանկարը` PanARMENIAN Photo-ի
