Հանրապետական խմբակցության քարտուղար Գագիկ Մելիքյանը համաձայն չէ այն կարծիքին, որ իշխանություններն արդեն որոշել են սահմանադրական փոփոխությունների արդյունքում Հայաստանում հաստատել խորհրդարանական կառավարման համակարգ։ Նրա խոսքով՝ դա առայժմ սահմանադրական փոփոխությունների հայեցակարգային դրույթ է, որը քննարկում է սահմանադրական փոփոխությունների հանձնաժողովը։
Հիշեցնենք, որ այսօր լրագրողների հետ հանդիպման ժամանակ հանձնաժողովի անդամ Գևորգ Դանիելյանը հայտարարել էր, թե «սահմանադրական բարեփոխումների քննարկումների արդյունքում վերջնական ընտրությունը կանգ է առել խորհրդարանական կառավարման վրա»։
Գ.Մելիքյանը նաև համաձայն չէ ոչիշխանական ուժերի այն տեսակետին, թե այդ փոփոխությամբ իշխանությունները ցանկանում են ապահովել իրենց վերարտադրությունը։ Այս դեպքում էլ Գ.Մելիքյանը հիշեցնում է Դաշնակցություն կուսակցությանը:
Նշենք, որ ՀՅԴ խմբակցության ղեկավար Արմեն Ռուստամյանը կողմ է արտահայտվում այդ փոփոխություններին, իսկ քառյակի մյուս կուսակցություններին՝ ՀԱԿ-ին, ԲՀԿ-ին և Ժառանգությանը մեղադրում էր սահամանադրական փոփոխություններին դեմ լինելու և աթոռակռվի մեջ:
Այս դեպքում էլ կարծիքներ կան, որ իշխանությունները ՀՅԴ-ի հետ բանակցում են նրանց պաշտոններ տալու և քառյակից պոկելու համար։ Գ.Մելիքյանն այս առիթով ասաց, թե տեղյակ չէ նման քննարկումներից։