Այսօր ԱԺ բրիֆինգների ժամանակ ՀՅԴ խմբակցության ղեկավար Վահան Հովհաննիսյանը հայտարարեց, որ Ընտրական օրենսգրքի քննարկումները ԱԺ քառօրյայում ցույց տվեցին, որ բանավեճի ընթացքում ՀՅԴ-ն հաղթել է կոալիցիային, որովհետև Դաշնակցության փաստարկներին հակափաստարկներ չհնչեցին։
Իսկ արդյունքում հաղթեցին նրանք, ովքեր ավելի շատ ձեռք ունեին, հետևաբար կարողացան ավելի շատ կոճակներ սեղմել։
«Բոլորը տեսան, որ մենք ճիշտ ենք, բայց մանդատների քանակը հաղթեց։ Մեծամասնությունը պետք է փոքրամասնությանը լսի։ Ահա սրա բացակայությունն է, որ մարդկանց դուրս է հանում փողոց»,- ավելացրեց Վահան Հովհանիսյանը։
Նա նաև նկատեց, որ վարչապետը հայտարարել է, թե մեռյալ հոգիների թոշակի գործը ուղարկում են դատախազություն, և հարցրեց, թե ընտրություններին մասնակցած մեռյալ հոգիների գործը ինչո՞ւ չեն ուղարկում դատախազություն։
Վահան Հովհանիսյանը նաև հիշեցրեց այդ ամենի թիկունքում կանգնած քաղաքացիները կառավարության մոտ բողոքի ցույց էին անում և ասում էին, որ իրենց հետ հաշվեհարդար տեսնող իշխանություններին իրենք ձայն են տվել։ Ինչ վերաբերում է մեծամասնականին, ապա Վահան Հովհանիսյանը ավելացրեց.
«41 պատգամավորից 29-ը այս ընթացքում ծպտուն չեն հանել, 7-ը համեմատաբար ակտիվ են եղել, 5-ը` 1-2 անգամ են ծպտուն հանել։ Հիմա եկեք տեսնեք, թե էս 41-ի օգուտը ո՞րն է, քանի որ նրանք ընդհանրապես խորհրդարանական կյանքում չկան»։
Ի դեպ, ՀՅԴ-ն Ընտրական օրենսգրքում առաջադրած 11 կետերը «Ժառանգության» հետ է քննարկել և, Վահան Հովհանիսյանի ու Ստյոպա Սաֆարյանի ստորագրությամբ, ուղարկել Վենետիկի հանձնաժողով։
