Վրաստանի ԱԳՆ-ն պնդում է, որ Նյու Յորքում ՄԱԿ-ի Գլխավոր ասամբլեայի 69-րդ նստաշրջանին երկիրը պետք է ներկայացնի միայն մեկ պատվիրակություն՝ վարչապետ Իրակլի Ղարիբաշվիլիի ղեկավարությամբ, և սխալ է համարում նախագահ Գեորգի Մարգելաշվիլիի որոշումը՝ առանձին պատվիրակությամբ նույնպես այնտեղ ուղևորվելու մասին: Այս մասին փոխանցում է RIA Novosti-ն:
Ավելի վաղ արտգործնախարար Մայա Փանջիկիձեն հայտարարել էր, որ իր գերատեսչությունը խորհրդակցություններ է անցկացնում նախագահի վարչակազմի հետ, որպեսզի պետության ղեկավարը հրաժարվի ուղևորությունից: Նստաշրջանը կանցկացվի սեպտեմբերի 21-30-ը: Երկրի ԱԳՆ-ն արդեն աշխատանք է իրականացնում՝ կազմակերպելու վրացական պատվիրակության այցը՝ վարչապետի գլխավորությամբ:
Արտգործնախարարի առաջին տեղակալ Դավիթ Զալկալիանիի հավաստմամբ՝ երկու պատվիրակությունների այցը լրջորեն վնաս կհասցնի Վրաստանի իմիջին: Նրա խոսքով՝ չի եղել նախադեպ, որ այդ միջոցառմանը ներկայացված լինեն մեկ երկրի երկու առաջնորդներ:
Նախագահն իր հերթին ավելի վաղ հայտարարել էր, որ հրավեր է ստացել ՄԱԿ-ի գլխավոր քարտուղար Պան Գի Մունից՝ մասնակցելու գագաթնաժողովին՝ նվիրված կլիմայական փոփոխությունների հարցին:
