«Ա՛յ տղա, լքողի հետևին ձեռքով կտամ,- լրագրողի՝ ինչո՞ւ եք լքում խրամատը հարցին ի պատասխան՝ նետեց հանրապետական խմբակցության պատգամավոր, գեներալ Մանվել Գրիգորյանն ու հեռացավ։
Հիշեցնենք, որ շաբաթ օրը Հանրապետական կուսակցության խորհրդի նիստում կուսակցության նախագահ Սերժ Սարգսյանը կուսակից պատգամավորներին հորդորել էր անձնական գործերը մի կողմ դնել և մասնակցել Ազգային ժողովի նիստերին։ Նա ԱԺ-ն համեմատել էր խրամատի հետ, իսկ օրենսդրական աշխատանքը՝ նրանց կռվի։ «Այսօրվանից ձեր բոլոր անձնական կամ ոչ անձնական այլ խնդիրներն ու ծրագրերը դնում եք մի կողմ, մղում երկրորդ պլան», – դիմելով պատգամավորներին և ընդգծելով խորհրդարանում ստեղծված վիճակը՝ ասել է հանրապետության նախագահը: Հատուկ անդրադարձ է եղել ԱԺ նիստերից բացակայող պատգամավորներին: «Այդպիսի մարդիկ ինձ համար նման են այն զինվորներին, ովքեր թողնում են խրամատը: Մեր երկրում բազմաթիվ խնդիրներ կան լուծելու, մենք հազարավոր ծրագրեր ունենք իրականացնելու, և ձեր բոլորի կռվի դաշտը և ձեր խրամատն էլ խորհրդարանն է, ձեր կռիվը` օրենսդիր աշխատանքը, ձեր թշնամին` մեր ժողովրդի հոգսերն են, մեր երկրում եղած պրոբլեմներն են: Եթե զինվորը լքում է խրամատը, ապա գրոշի արժեք չունի, թե այդ ընթացքում այդ զինվորը ինչ աշխարհացունց այլ աշխատանք է կատարում: Եվ եթե զինվորը խրամատում է ու չի կրակում անհրաժեշտ պահին, այդ զինվորն էլ գրոշի արժեք չունի: Խորհրդարանականի կարևորագույն խնդիրն է՝ մասնակցել աշխատանքներին, առաջին հերթին՝ նստաշրջաններին և քվեարկել այնպես, որպեսզի մեր ծրագրերն իրականանան», – հայտարարել էր Ս։Սարգսյանը։
