Վերաքննիչ քրեական դատարանում սկսվեց Ռուզաննա Ս.-ի գործով բերված վերաքննիչ բողոքի քննությունը:
Գործը քննվել է Շենգավիթ վարչական շրջանի ընդհանուր իրավասության դատարանում Նելլի Բաղդասարյանի նախագահությամբ:
Ըստ մեղադրանքի՝ Ռուզաննան 2013 թվականի նոյեմբերի 10-ին «Օդնոկլասնիկի» համացանցային կայքում ամուսնու նախկին սիրուհու՝ Գայանեի անունով բացել է կայքէջ, որտեղ առանց իր ախոյանուհու համաձայնությունը ստանալու տեղադրել է նրա մերկ լուսանկարը, այսինքն տարածել է տուժողի վերաբերյալ անձնական գաղտնիք պարունակող տեղեկություն:
Ռուզաննան մեղավոր է ճանաչվել ՀՀ քրեական օրենսգրքի 144 հոդվածով:
Ռուզաննայի խնամքին են երեք անչափահաս երեխաները՝ 15, 12 և 3 ու կես տարեկան:
Նախաքննության ընթացքում մեղքն ընդունած Ռուզաննան ընդհանուր իրավասության դատարանում դատաքննության ժամանակ հայտարարել է, թե ամուսնու նախկին սիրուհու մերկ լուսանկարը նրա անունով բացված կայքէջում տեղադրել է ոչ թե ինքը, այլ տասնչորսամյա որդին:
Պատանին դատարանում հաստատել է մոր ասածը, թե հոր սիրուհու մերկ լուսանկարն ինքն է տեղադրել համացանցում՝ լուսանկարը վերցնելով հոր հեռախոսի չիպից:
Մեղադրողը հաստատված է գնահատել Ռուզաննայի մեղքը մեղսագրված արարքում, միջնորդել է մեղավոր ճանաչել նրան և դատապարտել 300 հազար դրամ տուգանքի:
Ռուզաննայի շահերի պաշտպանը՝ հանրային պաշտպանի գրասենյակի փաստաբան Կարեն Մանուչարյանը, պաշտպանական ճառում նշել է, թե իր պաշտպանյալը նախաքննության ժամանակ մեղքն իր վրա է վերցրել՝ անչափահաս որդուն «ավելորդ տվայտանքներից» զերծ պահելու համար և դատարանում ասել է իսկությունը, դա պատժից խուսափելու միջոց կամ «լավ բեմականացում» չէ, ինչպես բնորոշել է մեղադրանքի կողմը, դա իրականությունն է:
Ըստ պաշտպանի՝ անչափահաս վկայի մանրամասն խոստովանությունը դատական քննության ժամանակ չի հերքվել որևէ ապացույցով:
Ամբաստանյալի անչափահաս որդին հաղորդագրություն է ուղարկել հայրիկի սիրուհուն. «Պապայիս տված նվերը քեզ դուրա գալիս չէ՞, տես հիմա ոնց ես վառվում, հերս ա տվել ու ասել՝ հենց մի սխալ քայլ անի, գցի սայտ…»:
Անչափահաս տղան հաղորդագրություն է գրել նաև հայրիկի սիրուհու եղբորը՝ ասելով. «Հերիք չի մեր ամեն երջանկությունը տարավ, նորից մեր տունն ա քանդում ձեր քույրը…»:
Պաշտպանը պնդել է, թե դատաքննությամբ ձեռք բերված ապացույցներով հերքվել է Ռուզաննային առաջադրված մեղադրանքը:
Ըստ պաշտպանի՝ անհերքելի են ապացույցները, որ հոր սիրուհու մերկ լուսանկարը կայքէջ է գցել անչափահաս տղան, ում արարքը պայմանավորված է եղել տուժողի անբարո վարքագծով թե՛ երեխայի, թե՛ ամբողջ ընտանիքի անդամների նկատմամբ:
Պաշտպանը խնդրել է Ռուզաննային արդարացնել, ճանաչել անպարտ ու դադարեցնել նրա նկատմամբ քրեական հետապնդումը:
Ամբաստանյալ Ռուզաննան վերջին խոսքում ասել է. «Չի կարելի ուրիշի դժբախտության վրա երջանկություն կառուցել»:
Ռուզաննան շեշտել է, թե ամուսինը մնացել է ընտանիքում, իր երեխաների գլխին:
Ընդհանուր իրավասության դատարանը անհամոզիչ է համարել պաշտպանական կողմի վարկածը:
Դատարանը մեղավոր է ճանաչել Ռուզաննային և դատապարտել 250 հազար դրամ տուգանքի:
Դատարանն առանց քննության է թողել տուժողի ներկայացրած քաղհայցը՝ պատճառված վնասի հատուցման վերաբերյալ՝ 1 միլիոն 100 հազար դրամի չափով:
Դատավճռի դեմ վերաքննիչ բողոք էր բերել ամբաստանյալ Ռուզաննայի շահերի պաշտպան Կարեն Մանուչարյանը:
Վերաքննիչ քրեական դատարանում նա հիմնավորեց բողոքը՝ անչափահաս տղայի դատաքննական ցուցմունքից մեջբերումներ կատարելով ու պնդելով, թե հոր սիրուհու մերկ լուսանկարը համացանցում հանրայնացրել է տասնչորսամյա տղան՝ տուժողի անբարո վարքագծից վրդովված լինելով:
«Տուժողի սանձարձակ վարքագիծը խիստ բացասական է ազդել երեխայի հոգեվիճակի վրա… նա երկար ժամանակ սթրես է տարել»,- ասաց պաշտպանը՝ հենց սթրեսային հոգեվիճակով էլ բացատրելով տղայի արարքը:
Ըստ պաշտպանի՝ ընդհանուր իրավասության դատարանը կայացրել է անարդար ու անհիմն դատական ակտ, գործով բավարար ապացույցներ ձեռք չեն բերվել Ռուզաննայի նկատմամբ մեղադրական դատական ակտ կայացնելու համար:
Պաշտպանը միջնորդեց բեկանել ընդհանուր իրավասության դատարանի դատավճիռը, Ռուզաննային արդարացնել, նրա նկատմամբ դադարեցնել քրեական հետապնդումը:
Ամբաստանյալ Ռուզաննան ասաց, թե ինքը չի տեղադրել ամուսնու սիրուհու մերկ լուսանկարը, բայց քննիչի մոտ մեղքն իր վրա է վերցրել, որ երեխան քաշքշուկի մեջ չընկնի:
Նախագահողը հարցրեց, թե ինչո՞ւ է Ռուզաննան փոխել դիրքորոշումը, հիմա ցանկանո՞ւմ է, որ տղան «ընկնի քաշքշուկի մեջ»:
Նախագահողը հարցրեց նաև՝ եթե Ռուզաննան տեղեկություն չուներ ամուսնու սիրուհու մերկ լուսանկարից, այդ լուսանկարը ինչպե՞ս է նախաքննության ժամանակ հայտնաբերվել հենց նրա բջջային հեռախոսի զննության ժամանակ:
Ռուզաննան պատասխանեց, թե քննիչն է առաջարկել հեռախոսի մեջ գցել լուսանկարը, տղան գցել է, դրանից հետո է իր հեռախոսը զննվել:
Նախագահողը հարցրեց՝ եթե Ռուզաննայի որդին է համացանց գցել մերկ կնոջ լուսանկարը, ինչո՞ւ է Ռուզաննայի ամուսինը քննիչին դիմում գրել. «Իմ կինը դա արել է խանդից ելնելով, խնդրում եմ ներեք…»:
Ռուզաննան ասաց, թե ամուսինն էլ չի ցանկացել, որ որդին ընկնի քաշքշուկի մեջ:
Մեղադրողն առարկեց բերված բողոքի դեմ: Նա նշեց, որ նախաքննության ամբողջ ընթացքում խոսք չի եղել հանցավոր արարքը անչափահաս տղայի կողմից կատարված լինելու մասին:
Ըստ մեղադրողի՝ անգամ դատաքննության ժամանակ ամբաստանյալը երբեմն մոռանում էր իր առաջ քաշած նոր վարկածը և հին վարկածը հաստատող արտահայտություններ էր անում անզգուշաբար, օրինակ՝ տուժողին դատարանում ասել է. «Քո իրական պատկերը ցույց տվեցի»՝ նկատի ունենալով համացանց գցված մերկ լուսանկարը:
«Անչափահասը՝ տասնչորս տարեկան տղան, տվյալ հանցակազմի սուբյեկտ չէ, պաշտպանական կողմը ցանկանում է պատասխանատվությունը գցել երեխայի վրա: Մայրը կազատվի, երեխան էլ պատասխան չի տա»,- ասաց դատախազ Տ. Հակոբյանը:
Ռուզաննայի շահերի պաշտպան Կարեն Մանուչարյանին նախագահողի հնչեցրած հարցերը դուր չեկան: Նա ասաց, թե արդեն կասկած չունի, որ նախագահողը մերժելու է իր բողոքը և անփոփոխ է թողնելու ընդհանուր իրավասության դատարանի մեղադրական դատավճիռը: Հնչեցված հարցերից պաշտպանը նաև եզրակացնում էր, թե նախագահող դատավորը լավ չի ծանոթացել քրեական գործի նյութերին:
Պաշտպանը ժամանակ խնդրեց՝ նախագահող դատավորի՝ Մ. Պետրոսյանի դեմ ինքնաբացարկի միջնորդություն ներկայացնելու համար:
Դատարանը պաշտպանին ժամանակ տրամադրեց և հետաձգեց դատական նիստը:
