Ինչո՞ւ Հայաստանում չկա ընդհանուր քաղաքական օրակարգ. այս հարցը քննարկել են «Կենտրոն» հեռուստաընկերության «Հայկական ուրբաթ» հաղորդման մասնակիցները:
«Եթե դու քաղաքական գործիչ ես, հրապարակային գործիչ, պետք է ինքդ լրացնես քաղաքական օրակարգը: Այնպես չէ, որ օրակարգը բաց է: Քաղաքական ծրագրերը չպետք է հանդես գան նախագահական ընտրությունների ժամանակ, այլ՝ մշտապես»,- ասել է ԱԻՄ առաջնորդ Պարույր Հայրիկյանը և բանավեճի բոլոր մասնակիցների մշտական դիտարկումներին, թե օրակարգ չկա, արձագանքել է. «Բա ե՞ս»: «Երկիրը պետք է պատկանի քաղաքացիներին: Ես այս մասին խոսում եմ 87 թվականից: Մեր քաղաքական դաշտում կան շատ ուժեր, որ քաղաքական դաշտում վաղուց անելիք չունեն»,- ասել է նախագահի թեկնածուն: Իսկ երկրի առջև ծառացած հիմնական խնդիրներից մեկը նա համարել է «պետաիրավական համակարգի բարեփոխումը՝ մարդու իրավունքների ելակետով»: Պարույր Հայրիկյանը տեսակետ է հայտնել, որ եթե ոչ ողջ ընդդիմությունը, ապա ընդդիմության մի մասը «կգա միասնական օրակարգին և կհասնի ազգային համաձայնության թեկնածուի»:
«Հայաստանի քաղաքական օրակարգը մեծ մասով վաղուց հայտնի է՝ շուկայական տնտեսությամբ ժողովրդավարական պետությունը: Հարցն այն է, որ շուկայականի փոխարեն քրեաօլիգարխիկ, գաղութային պետությունն է, որ որևէ աղերս չունի ժողովրդավար պետության հետ: Ես ցանկություն ունեմ, որ երկրում գործեն օրենքները, այդ ժամանակ բոլոր հարցերը լուծում կստանան»,- ասել է ազգագրագետ Հրանուշ Խառատյանը: Նրա խոսքերով՝ ընդդիմության օրակարգ իրականում չկա: Մենք չունենք ռեալ քաղաքական այլընտրանք:
«Քաղաքական ասպարեզում կան կեղծ թիրախներ, սոցիալականում՝ իրական խնդիրներ՝ գործազրկություն, արտագաղթի կանխարգելում և այլն: Հայաստանը զարգացնելու համար պետք է 120 միլիարդ դոլար՝ 10 տարում: Մենք ունենք տարեկան 2 միլիարդ դոլար»,- ասել է սոցիոլոգ Ահարոն Ադիբեկյանը: Նրա խոսքերով՝ բարեփոխման համար անհրաժեշտ է մեծ ժողովրդավարություն, լինի երկու հզոր ուժ՝ իրար հակադիր և հավասարազոր: Ըստ սոցիոլոգի՝ չկա միասնական օրակարգ, որովհետև հիմնական կռիվը իշխանության համար է:
ՀՅԴ Հայաստանի Գերագույն մարմնի փոխներկայացուցիչ Արսեն Համբարձումյանն էլ ասել է, որ քաղաքական օրակարգ ունենալու համար հարկավոր է, որ դերակատար որժերն ունենան իրենց օրակարգերը, հրապարակ բերեն, և ընդհանուր քննարկումների արդյունքում ծնվի միասնական օրակարգ. «Մենք առնվազն այդ քայլը կատարել ենք: Օրակարգը, որ ներկայացրել ենք, բխում է մեր դավանած գաղափարախոսությունից, կոնյունկտուրայից բխող օրակարգ չէ, և անկախ ընտրության արդյունքներից՝ մենք շարունակելու ենք հետևել այդ օրակարգի կետերի իրականացմանը, որովհետև համոզված ենք՝ դա այն առաջնահերթություններն են, որոնք թույլ կտան, որ երկիրը դուրս գա այս վիճակից»: Արսեն Համբարձումյանն ասել է, որ մեր երկրում փողը բերում է իշխանությունը, իշխանություն՝ հավելյալ փող: Ընտրություններում էլ հաղթողը ստանում է ամեն ինչ, պարտվողը՝ ոչինչ:
