Ինֆորմացիոն Տեխնոլոգիաների Ձեռնարկությունների միությունը (ԻՏՁՄ) և Օրանժ Արմենիան Հայաստանում համակարգչային խաղեր նախագծողների համար յուրահատուկ հնարավորություն են ստեղծում մասնակցելու նոյեմբերի 10-12 Բելգրադում կայանալիք հեղինակավոր Casual Connect համաժողովին՝ միաժամանակ իրենց նախագծած խաղերը ներկայացնելով համաժողովին կից անցկացվող Indie Prize ցուցադրություն –մրցույթին:
Այս բացառիկ հնարավորությունից օգտվելու համար՝ ցանկացողները մինչև հոկտեմբերի 8-ը պետք է գրանցվեն «Բաց Խաղ» համակարգչային և բջջային խաղերի Հայաստանի բաց առաջնությանը որպես մասնակից: Բելգրադ մեկնող խաղը կնտրվի «Բաց Խաղ» առաջնության ժուրիի կողմից: Հավակնորդները մրցույթին պետք է ներկայացնեն ավարտուն խաղ: Մասնակցության պայմաններն ավելի մանրամասն հասանելի են www.opengame.am կայքում:
Casual Connect համաժողովը ներառում է խաղերի ցուցահանդես, դասընթացներ, թեմատիկ ներկայացումներ և այլն: Indie Prize մրցույթի մասնակիցները հնարավորություն ունեն ոչ միայն ցուցադրել իրենց խաղերը, այլև շփվել indie ծրագրավորողների հետ, փոխանակվել փորձով, ձեռք բերել նոր գործընկերներ և հմտություններ:
Հիշեցնենք, որ «Բաց Խաղ» համակարգչային և բջջային խաղերի նախագծման առաջնությունը կազմակերպվում է 2011թ.-ից սկսած Ինֆորմացիոն Տեխնոլոգիաների Ձեռնարկությունների Միության (ԻՏՁՄ) և «ՕրանժԱրմենիա» ընկերության կողմից: Այս տարի առաջնության գլխավոր հովանավորն է «ՍոֆթՔոնսթրաքթ» ընկերությունը:
