Այսօր Հայկական պետական մանկավարժական համալսարանում Ժողովրդավարության և համագործակցության ինստիտուտի նյույորքյան ներկայացուցչության ղեկավար, Հայկական պետական մանկավարժական համալսարանի պատվավոր դոկտոր, պրոֆեսոր, քաղաքագետ Անդրանիկ Միհրանյանը կարդաց դասախոսություն՝ «Հայաստան, Եվրասիական տնտեսական միության հեռանկարներ, ուկրաինական ճգնաժամ» թեմայով:
Դասախոսության ներածական խոսքին հաջորդեցին ուսանողների հարցերը Միհրանյանին, որոնք վերաբերում էին ոչ միայն Հայաստանի եվրասիական հեռանկարներին, այլև հայ-թուրքական հարաբերություններին, ԼՂ հակամարտության կարգավորման գործընթացին, ուկրաինական ճգնաժամին:
Մասնավորապես անդրադառնալով հարցին, թե ինչո՞ւ է ՀՀ անվտանգության երաշխավորը զենք վաճառում Ադրբեջանին, նա ասաց, որ Հայաստանը ՀԱՊԿ անդամ է, այսինքն՝ այդ պայմանագրի 5-րդ կետի համաձայն՝ ՀԱՊԿ մեկ անդամի վրա հարձակումը նշանակում է բոլորի վրա հարձակում, սակայն Ռուսաստանը չի ցանկանում պատերազմի վերսկսում, քանի որ դա կդառնա գլխացավանք իր համար, Եվրոպան էլ չի ցանկանում պատերազմ, քանի որ նավթամուղ կա Ադրբեջանում, և այդ տարածքն ընդհանրապես չափազանց բռնկվող է, ոչ էլ ԱՄՆ-ն է ցանկանում:
«Ռուսաստանը վաճառում է ու դրանից ստանում ֆինանսական օգուտ, բայց դրա հետ միասին շատ խորը ձևով քննարկվում է ՀՀ ԶՈՒ իրավիճակը, ներուժը, որպեսզի անհրաժեշտության դեպքում ոչ մի անգամ կասկած չլինի, թե որ կողմը կարող է առավելություն ունենալ ԶՈՒ-ի կողմից»,- ասաց Միհրանյանը:
Առաջարկում ենք մանրամասներին ծանոթանալ տեսանյութի միջոցով:
