Այսօր Հայաստանում չեք հանդիպի թուրքական արտադրության լոլիկի` ի տարբերություն մի քանի տարի առաջվա, երբ թուրքական փաթեթավորմամբ էր լոլիկ մտնում ՀՀ: Այսօր լրագրողների հետ հանդիպմանը նման հայտարարություն արեց գյուղատնտեսության փոխնախարար Գառնիկ Պետրոսյանը՝ հավելելով, որ հաճախ դրսից բերված լոլիկի վրա գրվում է տեղական արտադրության:
«Հնարավոր է` Վրաստանի տարածքով փոքր խմբաքանակներ ներմուծվեն: Հիմնական ներմուծումը կատարվում է Իրանից և Հունաստանից: Առաջին ինն ամսում ներմուծվել է 165 տոննա, և ներմուծման ծավալներն ավելանում են, քանի որ պահանջարկն է ավելանում»,- ասաց Պետրոսյանը՝ նշելով, որ խնդիր է դրված երկիրը ինքնաբավ դարձնել:
Ըստ Պետրոսյանի՝ տեղական արտադրողները դժգոհում են ոչ թե ներմուծումից, այլ ներմուծված լոլիկի էժանությունից, որը խոչընդոտում է տեղական արտադրանքի իրացմանը: Նրա բնորոշմամբ՝ հարևան երկրներում բնակլիմայական պայմանները շատ ավելի բարենպաստ են, և այդ պատճառով արտադրանքի ինքնարժեքը ցածր է:
Ամեն դեպքում` փոխնախարարը հայտնեց, որ ՀՀ-ում ավելանում է ջերմոցային տնտեսությունների թիվը՝ արդեն ավելի քան 130 հա ապակեպատ ջերմատներ կան, թաղանթապատ ջերմոցները 500 հա-ի են հասնում: Խնդիրն այն է, որ լոլիկի բերքը ջերմատներում կազմում է 20-22 կգ` մեկ քմ-ից, որը եվրոպական երկրների համեմատ կրկնակի ցածր է, և որը խիստ ազդում է ինքնարժեքի վրա: Փոխնախարարը կարևորեց ջերմոցների` ժամանակակից սարքավորումներով վերազինումը:
