Մուամար Քադաֆիի ռեժիմի դեմ պայքարին մասնակցում է ավելի քան 350 ինքնաթիռ: Ինչպես փոխանցում է France Presse գործակալությունը, այս մասին հայտնել է շտաբի պետերի միացյալ կոմիտեի ղեկավար փոխծովակալ Ուիլյամ Գորթնին հինգշաբթի օրը կայացած մամուլի ասուլիսի ժամանակ:
Գորթնիի տվյալներով, կեսից ավելին ամերիկյան ինքնաթիռներ են: «Կարելի է ասել, որ աճում է թե՛ կոալիցիոն ուժերի թիվը, թե՛ նրանց ռազմական կարողությունը»,- հայտարարել է փոխծովակալը:
Գորտնին նաև լիբիական իշխանություններին կոչ է արել դադարեցնել դիմադրությունը և չենթարվել Քադաֆիի ռեժիմին: «Մեր կոչը պարզ է` դադարեցրեք կռվել, սպանել ձեր քաղաքացիներին, դադարեք ենթարկվել Քադաֆիի հրամաններին»,- հայտարարել է Պենտագոնի ներկայացուցիչը:
Հիշեցնենք՝ ռազմական գործողությունները Լիբիայում սկսվել են մարտի 19-ին:
Հինգշաբթի օրը Թուրքիան հայտարարել էր, որ միանում է Լիբիայի ծովային տարածքի արգելափակման գործընթացին: Ավելի վաղ ՆԱՏՕ-ի գլխավոր քարտուղար Անդերս Ֆոգ Ռասմուսենը հայտարարել էր, որ իրենց առջև դրված առաջին պահանջը` հսկողություն սահմանել Լիբիայի օդային տարածքում, կարելի է համարել կատարված: Միևնույն ժամանակ ԱՄՆ-ն հայտարարում է, որ «մոտ օրերին» ղեկավարությունը կհանձնի ՆԱՏՕ-ի ուժերին, սակայն մասնակից երկրների դաշինքը միասնական դիրքորոշման չի եկել:
