Վրաստանի նախկին նախագահ Միխեիլ Սաակաշվիլին, որի նկատմամբ հայրենիքում հարուցվել է 3 քրեական գործ, իր կողմնակիցների հետ հանդիպել է Թուրքիայի և Վրաստանի միջև հսկիչ անցակետում և մի շարք կտրուկ հայտարարություններ արել երկրի ներկայիս իշխանությունների հասցեին: Վրաստանի իրավապահ մարմինները չեն կարողացել Սաակաշվիլիին ձերբակալել, քանի որ նա եղել է սահմանի թուրքական կողմում, բայց խոստացել են շուտով նրա անունն ընդգրկել Ինտերպոլի ամենաորոնվող անձանց «կարմիր շրջաբերականում»՝ գրում է kommersant.ru-ն:
Միխեիլ Սաակաշվիլին «Միացյալ ազգային շարժում» նախկին իշխող կուսակցության ղեկավարների հետ հանդիպել է Սարպի բնակավայրի սրճարաններից մեկում: Հանդիպմանը մասնակցել են խորհրդարանի պատգամավորներ՝ «Միացյալ ազգային շարժում»-ից, երկրի մշակույթի նախկին նախարար Գոկա Գաբաշվիլին, Աջարիայի ինքնավարության նախկին ղեկավար Լևան Վարշալոմիձեն և արդարադատության նախկին փոխնախարար Գեորգի Ջոհաձեն:
«Ես ընտանիքիս հետ հանգստանում էի Թուրքիայում և որոշեցի ձեզ հետ շփվել այստեղ»,- ասել է Սաակաշվիլին և անմիջապես անցել Վրաստանի ներկայիս կառավարության քննադատությանը: «Այն, ինչ տեղի է ունենում հսկիչ անցակետում, խորհրդանշում է իրավիճակն ամբողջ երկրում: Մենք ժամանակին արեցինք ամեն ինչ, որպեսզի այստեղ ոչ մի հերթ այլևս երբեք չլիներ»,- ասել է Սաակաշվիլին՝ հիշեցնելով, որ մի քանի անգամ փոխել է «Սարպի» անցակետի ամբողջ կազմը՝ որպես պատիժ սահմանին գոյացած հերթերի և մեծ հարկերի համար:
Համախոհների հետ 1 ժամից քիչ ավելի տևած «խորհրդակցությունից» հետո Սաակաշվիլին անձամբ շփվել է սահմանն անցած վրացիների հետ՝ նշում է kommersant.ru-ն: Շատերը նրան ողջունել են ծափահարություններով և գրկել՝ պնդելով, որ նրա կառավարման ժամանակ «Վրաստանը զարգանում էր, իսկ հիմա անհույս լճացում է»:
«Ռուսթավի-2» հեռուստաալիքը, որը պատկանում է Սաակաշվիլիի մոտ ընկերներին, այդ ամենի մասին մեծ տեսանյութ է ներկայացրել: Արձագանքն այնքան մեծ է եղել, որ իշխանությունները ստիպված են եղել բացատրել, թե ինչու երկրի նախկին նախագահին չեն ձերբակալել հսկիչ անցակետի մոտ՝ չնայած նրա դեմ հարուցված քրեական գործերին:
«Միխեիլ Սաակաշվիլիի նկատմամբ առայժմ հայտարարված է միայն ներվրացական հետախուզում»,- ասել է երկրի գլխավոր դատախազության մամլո ծառայության ղեկավար Նատիյա Սուխիաշվիլին՝ ավելացնելով, որ «միջազգային կազմակերպությունների հետ արդեն տարվում են Սաակաշվիլիին Ինտերպոլի «կարմիր շրջաբերականում» ընդգրկելու աշխատանքներ»:
