Երևանի Խաչիկ Դաշտենցի անվան թիվ 114 դպրոցի տնօրեն Ռուզաննա Կոստանյանը «Առաջին լրատվական»-ի հետ զրույցում նշեց, որ թեև աշակերտների թվաքանակը 114 դպրոցում մեծ է եղել, այնուամենայնիվ, աշակերտների թիվը գնալով նվազում է: Այս տարի ընդունելության ցուցանիշները ցածր են եղել:
Աշակետների նվազումը տնօրենը պայմանավորում է թե՛ արտագաղթով, թե՛ նրանով, որ բոլոր բուհերն ավագ դպրոցներ են բացում, կենտրոնում շատ են քոլեջները, վարժարանները, քան մյուս վարչական տարածքներում:
«100 աշակերտ պակաս եմ ընդունել այս տարի: Այսօր հազարից մի քիչ ավել աշակերտ ունենք»,- ասաց Ռուզաննա Կոստանյանը:
Ավագ դպրոցում կրթության կազմակերպման հետ կապված խնդիրները, նրա դիտարկմամբ, լուծվել են: Այսօր չկա այնպիսի հարց, որ անլուծելի է:
Տնօրենը շատ է լսել, որ թիվ 114 դպրոցը համարում են հարուստների, հայտնիների զավակների դպրոց, սակայն դպրոցը չի առանձնացել նրանով, որ այստեղ հարուստների երեխաներ են սովորում:
«Այդ հարստությունն ինչո՞վ է չափվում… Ինձ և ուսուցիչներին բոլորովին չի հետաքրքրում՝ հարուստի՞ երեխա է գալիս, թե՞… Հիմնականում մտավորական, ինտելիգենտ մարդկանց երեխաներ են սովորել, և եթե անգամ այդպիսիներ եղել են, այնքան համեստ ու լուռ երեխաներ են եղել, որ չեմ կարող ասել, թե որևէ մեկի երեխան առանձնացել է: Հերմինե Նաղդալյանի երեխան ավարտեց այս դպրոցը, մի քանիսի երեխաները նույնպես, բայց նրանց համեստության մասին կարող եմ խոսել և զարմանալ: Ատոմ Ջանջուղազյանի երեխան է ավարտել այս դպրոցը. հրաշք մի երեխա»,- ասաց տնօրենը:
Հարցին՝ երբևէ հարուստները, պատգամավորները, որոնց երեխաները սովորում են թիվ 114 դպրոցում, աջակցե՞լ են դպրոցին, տնօրենը պատասխանեց, որ երբևէ նման որևէ խնդրով դպրոցին չեն օգնել:
«Մեկ-երկու հոգու դիմել եմ, որոշել եմ այլևս չդիմել: Անգամ շատ լավ շրջանավարտներ, ովքեր լավ աշխատանքների են, խոստացել են, բայց չեն արել: Մեկ աշակերտ ունեմ՝ Վիկտոր Մնացականյանը, դահլիճի երկու հանդերձարանների դռները փոխեց, ում շատ շնորհակալ եմ»,- հավելեց տնօրենը:
Ավելին՝ տեսանյութում: