Երևանի քաղաքապետարանի հանրակրթության վարչության պետ Գայանե Սողոմոնյանը «Առաջին լրատվական»-ի հետ զրույցում անդրադառնալով հարցին՝ արդյոք կա՞ն անհանգստացնող հարցեր նոր ուսումնական տարուն, նշեց, որ չկան շատ անհանգստացնող հարցեր, կան կառուցողական հարցեր՝ կապված շենքային պայմանների, դասագրքերի, ինչպես նաև սպասվելիք կրճատումների հետ, եթե իհարկե՝ կան: Օգոստոս ամսվա ընթացքում, որ դպրոցում խնդիր է եղել, հանդիպել են տնօրենների հետ, ֆինանսական վարչության մասնագետների հետ, այսօր անլուծելի հարց չունեն: Դասագրքերը բաժանման ընթացքում են՝ սկսած օգոստոսի 17-ից:
Գայանե Սողոմոնյանը չհերքեց, որ կարող են լինել դպրոցներ, որտեղ դասագրքերի պակաս կնկատվի, սակայն տնօրենի կողմից հայտ է ներկայացվում: Բացի այդ, նրա խոսքով, լինում են դեպքեր, երբ տնօրենները նախապես չէին կարող կանխագուշակել, թե որքան աշակերտ կունենան: «Այս ամառվա ընթացքում մենք շատ ունեցանք Ուկրաինայից եկած ընտանիքների երեխաներ, հիմնականում հիմնական դպրոցի երեխաներ»,- ասաց նա՝ հավելելով, որ մինչև սեպտեմբերի 10-ը բոլոր դպրոցներն ապահովված են լինում դասագրքերով:
Գայանե Սողոմոնյանից հետաքրքրվեցինք՝ ի՞նչ կարծիք ունի Մոսկվայի պետական համալսարանի երևանյան մասնաճյուղի բացման հետ կապված, և արդյոք կուզենա՞ր, որ իր զավակները այնտեղ սովորեին: «Ունեմ իմ սեփական կարծիքը, իմ երեխան հայ ընտանիքի երեխա է, հայրը հայ է, մայրը հայ է, արմատները հայ են, ուրեմն նրա առաջին սուրբ գործը պետք է լինի մայրենիին ոչ թե տիրապետելը, այլ գերազանց տիրապետելը, ոչ թե իմանալ հայ մշակույթ, և իր ժողովրդի պատմությունը, այլ գերազանց իմացությունն է պարտադիր: Դրանից հետո ես շատ ուրախ կլինեմ, որ իմ երեխան հայերեն մտածելով սովորի բազում լեզուներ, և իմ երեխաները առնվազն չորս լեզուներով խոսում են, թող կրթություն ստանան աշխարհի լավագույն բուհերում բայց իրենց գիտելիքները բերեն և ներդնեն այս պետության բարգավաճման համար»,- ասաց նա:
Նա նշեց, որ իր ամուսնու համար ամենակարևորը իրենից որպես մայր մեկ բան է եղել՝ երեխաները ճիշտ դաստիարակվեն, հայ մեծանան և տիրապետեն մայրենիին: «Դա իմ սուրբ պատականությունն է եղել, և ես կարողացել եմ դա անել»,- հավելեց նա:
Ավելին՝ տեսանյութում:
