«Վերնիսաժի» կրակոցների դեպքի օրը տարած սթրեսից խոսելու ունակությունը կորցրած Գոռ Առաքելյանի՝ Յուվեցի Կարոյի փեսայի 3-ամյա երեխայի վիճակը բավարար է, բայց ոչ լիարժեք: Երեխայի բուժումները դեռ շարունակվում են: Այդ մասին «Առաջին լրատվական»-ի հետ զրույցում ասաց ԱԺ ԲՀԿ-ական պատգամավոր Կարո Կարապետյանը՝ Յուվեցի Կարոն:
Վերջինս հրաժարվեց ասել թոռնիկին տեղափոխե՞լ են արդեն Հայաստան, թե՞ դեռ արտասահմանում է: «Հեռախոսով ոչ մի բան չեմ ցանկանում ասել»,- հայտարարեց ԲՀԿ-ական պատգամավորը՝ հրաժարվելով պատասխանել նաև քրեական գործի ընթացքի մասին մեր հարցերին:
Ինչ վերաբերում է գործի քննությանը, ապա դեռևս նախաքննություն է ընթանում: Առայժմ մի քանի փորձաքննություններ են կատարվել, իսկ գործով կալանավորված ու դեպքին մասնակից ոչ Վալերի Հովհաննիսյանը, ոչ էլ Ներսես Մելքոնյանը չեն հարցաքննվել, և որևէ այլ քննչական գործողություն չի կատարվել:
Ներսես Մելքոնյանի փաստաբան Վարդուհի Էլբակյանը մեզ ասաց, որ իր պաշտպանյալի առողջական վիճակն արդեն բավարար է, իսկ նախաքննական մարմնի կողմից կատարված փորձաքննությունները փաստում են, որ իր պաշտպանյալը կապ չի ունեցել կատարվածին: «Որևէ էական արդյունքի մասին չեմ կարող ասել, քանի որ այդ փորձաքննությունները ընդհանրական բնույթի էին, բայց այդ փորձաքննություններից որևէ մեկով որևէ ապացույց չի բերվել, որ իմ պաշտպանյալը կատարել է իրեն մեղսագրվող արարքը: Այդպիսի ապացույց այսօրվա դրությամբ դեռ ներկայացված չէ»,- ասաց Էլբակյանը:
Ինչ վերաբերում է Վալերի Հովհաննիսյանին, ապա նրա առողջական վիճակը դեռևս բավարար չէ, և նրան այդ վիճակով տեղափոխել են «Նուբարաշեն» ՔԿՀ, որի դեմ նրա պաշտպանը՝ Լևոն Բաղդասարյանը, բողոք է ներկայացրել:
Մինչ օրս կալանավորված է նաև Յուվեցի Կարոյի փեսան՝ Գոռը, սակայն որոշ խոսակցությունների համաձայն՝ Կարո Կարապետյանը իր ընկերական շրջապատում մշտապես վստահեցնում է, որ իր փեսան երկար նստած չի մնա: Նա ջանք ու եռանդ չի խնայում դրա համար:
Արդեն իսկ որոշակի գումարի դիմաց նրան հաջողվեց լռեցնել դեպքի օրը հրազենից վիրավորված պատահական անցորդներին: Նրանք այդպես էլ որևէ բողոք չներկայացրեցին և անհասանելի դարձան լրատվամիջոցների համար:
«Նույն ձև էլ փեսայիս կհանեմ»,- ըստ տեղեկությունների՝ վստահեցրել է ԲՀԿ-ական պատգամավորը:
