Վիկտորյա Բեքհեմը աճուդի է հանել իր զգեստապահարանի ավելի քան 600 զգեստները, որոնց վաճառքից գոյացած գումարները կուղղվեն Mother2mothers բարեգործական կազմակերպությանը:
The Outnet օնլայն խանութների ու Christie’s աճուրդի տան, որոնք գնահատել են «լոտերի» արժեքը, համագործակցությամբ իրերի աճուրդը մեկնարկել է օգոստոսի 20-ին ու տևելու է մինչև օգոստոսի 25-ը, գրում է Vogue.ua-ն:
«Ես շատ եմ ծիծաղել, երբ մենք դասավորում էինք իմ դարակները, քանի որ շատ իրեր կապված են իմ, Դևիդի ու երեխաների երջանիկ հիշողությունների հետ:
Շատ իրեր ստեղծվել են հատուկ ինձ համար ամենատաղանդավոր դիզայներների կողմից, ու ես հաճույքով կրում էի դրանք, սակայն հիմա ես զգում եմ, որ եկել է դրանք վայելելու ինչ-որ մեկի ժամանակը»,- պատմել է Վիկտորյա Բեքհեմը:
Վիկտորյան այցելել էր հարավային Աֆրիկայում Mothers2mothers բարեգործական կազմակերպության բազա ու անմիջապես պատրաստակամություն հայտնել միանալ դրա գործունեությանը:
Կազմակերպության նպատակն է օգնել ՄԻԱՎ-ով հիվանդ մարդկանց՝ բացատրելով նրանց վարակի բնույթը, ինչպես կանխարգելել դրա տարածումը, ինչպես նաև լավացնել նրանց առողջությունն ու երեխաների անվտանգությունը:
