ԱՄՆ-ը խստորեն դատապարտում է բռնության դեպքերը Ղարաբաղյան հակամատության գոտու՝ զորքերի շփման գծում, որոնց հետևանք է զոհերի մեծ թիվը: Այս մասին Վիեննայում ԵԱՀԿ մշտական խորհրդի նիստին հայտարարել է ԵԱՀԿ-ում ԱՄՆ դեսպան Հարի Ռոբինսոնը:
ԱՄՆ կառավարության անունից նա ցավակցություն է հայտնել զոհերի ու վիրավորների հարազատներին: Ռոբինսոնը կոչ է արել կողմերին՝ քայլեր ձեռնարկել լարվածության թուլացման համար և հարգել հրադադարի ռեժիմի հաստատման մասին համաձայնագրի դրույթները:
«Որպես ԵԱՀԿ Մինսկի խմբի համանախագահ՝ ԱՄՆ-ը կշարունակի աջակցություն ցուցաբերել հակամարտության բոլոր կողմերին՝ ապահովելու Լեռնային Ղարաբաղի հակամարտության տևական կարգավորում»,- նշել է նա:
Ամերիկացի դիվանագետը բացառել է հակամարտության ռազմական լուծումը և նշել, որ ԱՄՆ-ը ողջունում է Սոչիում կայացած հանդիպումը, ինչպես նաև հակամատության խաղաղ կարգավորման համար երկխոսությունը շարունակելու երկու նախագահների պատրաստակամությունը:
«Մենք կոչ ենք անում երկրներին՝ քաղաքական կամք դրսևորել և վարել կառուցողական բանակցություններ»,-ընդգծել է Ռոբինսոնը:
