Գրող Ջորջ Մարտինը պատմել է «Սառույցի և կրակի երգ» սագայում գեյ-սեքսի բացակայության պատճառների մասին, հայտնում է The Guardian-ը: Թերթը նշում է, որ Մարտինի վեպերում շատ են բռնության և սեքսի տեսարանները, բայց հեռուստատեսային «Գահերի խաղը» տարբերակում կարելի է տեսնել նաև ավելի բաց տեսարաններ: Գրողին այս թեմայով հարց է ուղղվել Էդինբուրգում գրքի միջազգային փառատնի շրջանակներում ընթերցողների հետ հանդիպման ընթացքում:
Մարտինը պատասխանել է, որ նման տեսարաններ կավելացներ իր սագայում, եթե դրանք պահանջվեին սյուժեի զարգացման համար: Գրողը բացատրել է, որ գրքերում պատմվում է կերպարների անունից, որոնցից ոչ մեկը համասեռամոլ չէ: «Հեռուստաշոուն այդպիսի սահմանափակումներ չունի»,- ասել է Մարտինը:
«Դա կփոխվի՞: Հնարավոր է: Ես նամակներ եմ ստանում երկրպագուներից, որոնք ուզում են, որ ես տղամարդկանց սեքսով առանձնապես բաց տեսարան ներկայացնեմ, և այդպիսի հաղորդագրությունների մեծ մասի հեղինակները կանայք են»,- ասել է գրողը: Սակայն Մարտինը խոստացել է այդպիսի տեսարան ստեղծել միայն այն դեպքում, եթե դա սյուժեն պահանջի:
«Դա ժողովրդավարություն չէ: Եթե դա ժողովրդավարություն լիներ, Ջոֆրին (թագավոր տղան) շատ ավելի վաղուց կմեռներ»,- ավելացրել է հեղինակը:
