Chromebook շարքի Chrome OS «ամպային» օպերացիոն համակարգով նոթբուքերի վաճառքը անցած տարվա համեմատ կաճի 79%-ով և կկազմի 5.2 մլն հատ: Lenta.ru-ի հաղորդմամբ՝ այս մասին ասվում է Gartner վերլուծական ընկերության զեկույցում:
Փորձագետնեի տվյալներով՝ «քրոմբուքերի» վաճառքի ծավալները հիմնականում կավելանան Հյուսիսային Ամերիկայում կրթության ոլորտի հաշվին: Կրթական հաստատությունները 2013-ին գնել են Chromebook-երի մոտ 85%-ը, իսկ հյուսիսամերիկյան շրջանին բաժին է ընկել վաճառքի 82%-ը:
Տարբեր մոդիֆիկացիաների Chromebook-երի վաճառքի համաշխարհային ծավալներն այս տարի կգերազանցեն 5.2 մլն-ը, իսկ մինչև 2017թ. այդ ցուցանիշը գործնականում կեռապատկվի՝ մինչև 14.4 մլն նոթբուք:
Ներկայում շուկայում կա Chromebook-ի 8 մոդել, սակայն աշխարհի տարբեր երկրներում դրանց հասանելիությունը սահմանափակ է: Chromebook-ի խոշորագույն մատակարարներն են Google-ի առաջին գործընկերները՝ Samsung-ը և Acer-ը: 2013-ին առաջին ընկերությանը բաժին է ընկել «քրոմբուքերի» շուկայի մոտ 65%-ը, իսկ Acer-ին՝ ավելի քան 21%: Սարքերի այլ արտադրողներից են՝ HP-ն (6.8%), Lenovo-ն (6.7%) և Dell-ը (0.3%):
