Այսօր Կենտրոնական կլինիկական զինվորական հոսպիտալ այցելած պաշտպանության նախարար Սեյրան Օհանյանը Հայրենիքի սահմանների պաշտպանության գործում ցուցաբերած անձնական խիզախության և նվիրումի, կյանքին սպառնացող վտանգի պայմաններում ծառայողական պարտքը պատշաճ կատարելու համար ՀՀ նախագահ Սերժ Սարգսյանի հրամանագրով Արիության մեդալով պարգևատրված շարքային Նորայր Միքայելի Քամալյանին հանձնեց պետական բարձր պարգևը:
Հիշեցնենք, որ հուլիսի 31-ին ղարաբաղաադրբեջանական հակամարտ զորքերի շփման գծի հյուսիսային ուղղությամբ տեղակայված զորամասերից մեկի պահպանության տեղամասի մարտական հենակետի ուղղությամբ հակառակորդի ձեռնարկած հարձակման արդյունքում զոհվել են ՊԲ զինծառայողներ 1994 թ. ծնված Արարատ Վաչիկի Խանոյանը և Ազատ Արթուրի Ասոյանը: Նորայր Քամալյանը անզեն ձեռնամարտի էր բռնվել զինված հակառակորդի հետ:
«Առաջին լրատվական»-ին հերոս զինծառայողը պատմել է, թե ինչ է իրականում տեղի ունեցել. «Չորս հոգով գնում էինք մի շաբաթվա պրոդուկտի, մետրուկես աջի վրա իրենք նստած էին, հենց հասանք իրենց կողք, միանգամից սկսեցին կրակել, հելան կանգնեցին, սկսեցին խնդալը, ես էլ միանգամից հարձակվեցի վրեն, սկսեցի կռվել, հետո երկուսով եկան վրես, որ գոռացի, երեքով էին խփում, ես էլ էի խփում, թողին փախան, մեկը բաքսյոր էր, երեսիս էր խփում, հետո երկուսով սկսեցին խփել, հելա կանգնեցի, տեսա երկու ընկերս այլևս չկան, մեռած են: Վազեցի պոստ, օգնություն խնդրեցի»,- պատմեց Նորայրը՝ հավելելով, որ հակառակորդը չորս հոգով էր, իրենք էլ էին չորս հոգով, մեկը վախից հետ է գնացել, իսկ երկուսն էլ խփել են:
Հերոս զինվորը նշեց, որ ինքը մեծ պատասխանատվությամբ և սիրով է մեկնել ծառայության: Չորս ամիս էր մնացել զորացրվելուն: Անկեղծորեն խոստովանում է, որ այս մեկուկես տարվա ընթացքում երբևէ լարվածություն չի նկատել:
Հայրը՝ Միքայել Քամալյանը, ազատամարտիկ է, կռվել է Ավոյի ջոկատում, Ավոյի մահից հետո էլ շարունակել է պայքարը մինչև 96թվականը:
«Զույգ եղբայրներ են, երկուսն էլ դիրքերում, ուրախ ենք, որ կարողանում են պաշտպանել մեր հողերը, հպարտ ենք: Մյուս տղաս հինգ օրով արձակուրդ եկավ, եղբորը տեսավ, վաղը կլինի դիրքերում»,- ասաց ազատամարտիկ հայրը՝ հավելելով, որ պատերազմի դեպքում ինքն էլ, բոլոր ազրատամարտիկներն էլ մասնակցելու են պատերազմին:
Քամալյանների ընտանիքը Ղարաբաղի Մարտունի շրջանի Գիշի գյուղից է:
Ավելին՝ տեսանյութում:
