Green Day խումբն իր նոր` ¡Tre! ալբոմը, որը եզրափակում է նրանց երաժշտական ¡Uno!, ¡Dos!, ¡Tre! եռագրությունը, պաշտոնական թողարկումից մի քանի օր առաջ տեղադրվել է nme.com կայքում: Ալբոմը կթողարկվի Մեծ Բրիտանիայում դեկտեմբերի 10-ին` հայտնում է RIA Novosti-ն:
¡Uno!, ¡Dos!, ¡Tre! ալբոմը 3 փուլով է թողարկվել` սեպտեմբերին հայտնվել է ¡Uno!-ն, նոյեմբերին` ¡Dos!-ը: Վերջին մասի թողարկումը ծրագրված էր 2013-ին: Սակայն Green Day-ի առաջատար Բիլի Ջո Արմսթրոնգը վերջին համերգի ժամանակ տեղափոխվել էր վերականգնողական կենտրոն, որտեղ կմնա մինչև հաջորդ տարի, և խումբը որոշել է թողարկվող սկավառակով փոխհատուցել կենդանի ելույթների բացակայությունը:
Green Day-ը խոստացել է 2013-ին նաև ¡Quatro! փաստագրական ֆիլմ թողարկել: Խմբի բասիստ Մայք Դերնթի խոսքով` ֆիլմը երկրպագուներին կօգնի ավելի լավ հասկանալ, թե ինչպես են անցել եռագրության աշխատանքները:
