«Տնտեսական աճը ոչնչով իր մաշկի վրա քաղաքացին չի զգացել, որովհետև տարիներ շարունակ տնտեսությունը զարգանում է իր կանոններով, և կողքից մեկուսի մարդկային զարգացում է: Այն երկրներում, որտեղ մենք տեսնում ենք աճը մարդկանց վրա, դրանք փոխկապակցված են, մեզանում` առանձին: Վստահ չեմ, որ այսօր ամեն ինչի կենտրոնում դրված է մարդը»,- «Հ2» հեռուստաընկերության «Խոսքի իրավունք» հաղորդման եթերում ասել է «Այլընտրանք» հետազոտական կենտրոնի ղեկավար Թաթուլ Մանասերյանը: Նրա խոսքերով՝ միայն այն ժամանակ, երբ տնտեսական զարգացումը կվերածվի մարդկային զարգացման, տնտեսական աճը կզգա նաև մեր քաղաքացին: Տնտեսագետը նաև նշել է, որ քանի դեռ մեր երկրում նվազագույն կենսաթոշակն ու աշխատավարձը չեն հավասարվել կենսապահովման նվազագույն զամբյուղին, զարգանալու մասին խոսելու բարոյական իրավունք չունենք: «Այժմ մենք վերականգնողական փուլում ենք. հուսամ` հաջող կավարտենք»,- ասել է Թաթուլ Մանասերյանը:
Նա նշել է, որ Հայաստանում պետք է պահանջարկված դարձնել երիտասարդների գիտելիքները: «Պահանջարկված չէ հատկապես պետական կառավարման համակարգում: Մենք չպետք է փող խնայենք միջին կարգի մասնագետների և առաջատար մասնագետների վրա: Պետք է նրանք խոցելի չլինեն և չմտածեն կողքից այլ աշխատանքի մասին: Խոսքս վերաբերում է նաև երիտասարդ գիտնականներին»,- ասել է Մանասերյանը` հավելելով, որ այսօր թեկնածուական աշխատանքներ են գրում հիմնականում տղաները, այն էլ` բանակից խուսափելու համար: Այս և այլ բազում խնդիրներ, ըստ նրա, հնարավոր է լուծել առանց ֆինանսական լուրջ ներդրումների: Իսկ չլուծելը դարձել է պատճառ, որ Հայաստանը աշխատուժի դոնոր երկիր է դառնում: Մասնագետները լքում են երկիրը: Աղքատության մակարդակը, տնտեսագետի հաշվարկներով, շատ ավելի բարձր է, քան պաշտոնական վիճակագրությունն է նշում. «Աղքատության շեմից ցածր է գտնվում Շիրակի մարզի բնակչության կեսից ավելին: Առաջինը հենց աղքատ բնակչությունն է մերձավոր արտերկիր գնալով՝ ժամանակավոր աշխատանքի խնդիր լուծում: Լուրջ քայլեր այս ուղղությամբ առայժմ չկա»:
Թաթուլ Մանասերյանը դժգոհել է նաև գյուղնախարարությունից` ասելով, որ պետք է նախարարությունը համալրվի նորմալ մասնագետներով: «Նախարարի մակարդակով նշվում է, թե մենք կարող ենք հացահատիկի մասով 70 տոկոս ինքնաբավ լինել, բայց մենք երկար ուսումնասիրել ենք և պարզել, որ Հայաստանը ոչ միայն կարող է ինքնաբավ լինել ամբողջությամբ և արտահանել, այլև պետական ռեզերվներն ընդլայնել»,- ասել է տնտեսագետը` հորդորելով նախարարության մասնագետներին չնստել իրենց սենյակներում, այլ այցելել գյուղեր և վերջապես հասկանալ, թե ինչ վիճակում է գյուղացին:
Անդրադառնալով կոռուպցիայի դեմ պայքարի վերաբերյալ բարձր կառավարական կոչերին, Թ. Մանասերյանն ասել է, որ այդ կոչերը մարդկանց մոտ քմծիծաղ են առաջացնում, որովհետև պաշտոնը չարաշահողին հաճախ ընդամենն ուղարկում են ռեզերվ` այլ պաշտոնի նշանակելու նպատակադրմամբ:
