Հուլիսի 31-ին ղարաբաղա-ադրբեջանական շփման գծի հյուսիսային հատվածում մարտական հերթապահություն իրականացնող զորամասերից մեկի պահպանության տեղամասի ուղղությամբ հակառակորդի դիվերսիոն գործողության արդյունքում զոհվել են ՊԲ զինծառայողներ՝ 1994թ. ծնված Արարատ Խանոյանը և Ազատ Ասոյանը:
«Անշառ, անմեղ»,- լաց լինելով՝ հերոս Արարատին բնորոշում է հարևան Ծաղիկ տատը:
«Չարաճճի էր, բայց շատ հարգանքով, սիրված բոլորի կողմից, կամեցող, առատաձեռն»,- մեկը մյուսին հերթ չտալով՝ պատմում են հարևանները: Երեք օր է, ինչ լսել են Արարատի զոհվելու մասին լուրը, երեք օր է՝ ոչ հաց են ուտում, ոչ քնել կարողանում:
Հարևան Ծաղիկ տատն էլ շարունակեց. «Ողբում ենք մորը, ահավոր է վիճակը: Նա իր կյանքն է դրել, որ մենք հանգիստ քնենք. պետք է գնահատենք»:
Հարևանուհի Անին պատմեց, որ Արարատը շատ մտերիմ է եղել իր ամուսնու հետ. «Ամեն հարցում ամուսնուս հետ կիսվում էր, իր սիրտը շատ մաքուր էր, անկեղծ: Իր մահը մեզ համար մեծ ցավ է»,-պատմեց նա՝ հավելելով, որ վերջերս էր եկել արձակուրդ:
«Գիշերը ժամը երկուսին եկել էր օտպուսկ ու առաջինը եկել էր մեզ տեսնի: Սկեսրայրիս հետ է խոսել, շատ երազանքներ ուներ Արարատը»,- ասաց Անին:
Նա հուզված պատմեց, որ Արարատը ուզում էր բանակից գալ, ամուսնանալ, ընտանիք կազմել, ծնողների հոգսը թեթևացնել:
«Պետք է գամ՝ մամային, պապային ավելի լավ նայեմ, իրենց էլ չեմ թողնելու աշխատեն: Ինքը մաքուր անձնավորություն էր»,- ասաց Անին՝ հավելելով, որ այս անգամ դիրքեր բարձրանալիս զանգել է մորը, ասել. «Մա՛մ ջան, գնում եմ պոստեր, էստեղ ժամանակս շուտ է անցնում, պապ ջան, ավտոս կսարքես: Հայրն էլ ասել է՝ մինչև իջնես, ես կպատրաստեմ քո ավտոն: Ասել էր, որ ամսի 9-ին կիջնի պոստից: Մամ ջան, շուտ կգամ, չմտածես», -լաց լինելով ասաց Անին՝ հավելելով, որ Արարատը ծառայության ընթացքում երբեք նեղություն չի տվել ծնողներին, երբեք ծառայությունից որևէ բացասական բան չի պատմել, միայն դրական…
Ավելին՝ տեսանյութում:
