Այս տարվա առաջին կիսամյակում կտրուկ նվազել է Հայաստանից ոչխարների և այծերի արտահանումը: Նշված ժամանակահատվածում արտահանվել է ընդամենը 9 հազար 600 գլուխ՝ անցած տարվա 21 հազար գլխի համեմատ:
Արտահանման ծավալների կտրուկ նվազումը, հիմնականում այս գործով զբաղվող եզդիների խոսքով, պայմանավորված է Իրանով: Իրանն է կտրուկ հրաժարվել պայմանագիր կնքել հայկական կողմի հետ: «Իրանը չի ուզում պայմանագիր կնքել մեզ հետ: Իրենք նշել են, որ այս տարի որևէ գործարք չեն կատարելու մեզ հետ, քանի որ իրենց մոտ ինչ-որ հիվանդություն է ի հայտ եկել, ինչի պատճառով էլ հրաժարվում են անասուն ներկրել: Եթե ներկրեն էլ, ապա շատ քիչ քանակությամբ: Բայց կրկնում եմ՝ որքան տեղյակ եմ, այս տարի արտահանում չի եղել, իսկ անցած տարի էս ժամանակ արդեն ահագին տարել էին»,- «Առաջին լրատվական»-ի հետ զրույցում ասաց Եզդիների միության նախագան Ազիզ Թամոյանը՝ հավելելով, որ, անկախ ամեն ինչից, իրենք համապատասխան գլխաքանակ ունեն և փորձում են տեղական շուկայում սպառել իրենց ապրանքը:
«Մենք չենք կանգնեցնի մեր գործը, քանի որ դա օգտակար է և մեզ համար, և պետության համար: Եղածը հայկական շուկայում ենք իրացնում, կրճատել ենք քանակը, որը պետք է բավարարի միայն մեր տեղական շուկայի պահանջարկը»,- ասաց Թամոյանը: Նրա խոսքով, սակայն, արտահանման ծավալների կրճատումը կհանգեցնի շուկայում մսի գնի բարձրացմանը, քանի որ եթե անասունների գլխաքանակը նվազում է, մսի գինը մեխանիկորեն բարձրանում է: «Եթե Իրանը գա, գինը կնվազի, բայց ինձ թվում է՝ այս տարի չի գա: Չնայած նորմալ է, ծայրահեղ վիճակ չէ, չեմ բողոքում: Մերոնց հետ էլ եմ ամեն օր հանդիպում, զրուցում, դժգոհություն չկա»,- նկատեց Թամոյանը:
Վերջինից հետաքրքրվեցինք՝ Իրանը միայն եզդիների՞ց ոչխար չի ներկրում, թե՞ առանձին անհատներից ևս, ովքեր զբաղվում են այդ գործով: Մեր զրուցակցի խոսքով՝ վիճակը համատարած է, Իրանը պայմանագիր չի կնքում նաև առանձին անհատների հետ: Այդ թվում և Սաշիկ Սարգսյանի՞ հետ՝ հարցրինք: «Գիտեք, դա հերյուրանք է, կեղծիք է: Ինձ ասել են մի քանի անգամ դրա մասին, ես զբաղվել եմ և պարզել, որ նա կապ չունի: Պապայի գերեզման եմ երդվում՝ Սաշիկը չի զբաղվում այդ գործով, այդ հարցերի մեջ չի մտել, դա զրպարտանք է: Վերևն Աստված կա, չէ»,- ասաց Ազիզ Թամոյանը:
Նրա խոսքով, այս տարի կրճատվել են նաև խոշոր եղջերավոր անասունների արտահանման ծավալները: Եթե անցած տարի Վրաստանի հետ պայմանագիր է եղել խոշոր եղջերավոր անասունների արտահանման գծով, ապա արդեն մի քանի ամիս է, Թամոյանի բնորոշմամբ՝ դա էլ է «կտրվել», քանի որ ծախսատար է: Նշենք, որ արտահանվող յուրաքանչյուր խոշոր եղջերավոր անասունի միջին մաքսային արժեքը կազմել է 268 դոլար:
ՀՀ գյուղատնտեսության նախարարության անասնաբուժության և անասնաբուծության վարչության պետ Աշոտ Հովհաննիսյանի խոսքով, այս տարի Հայաստանում, անկախ արտահանման ծավալների կրճատումից, նկատվում է ոչխարների և այծերի գլխաքանակի աճի միտում: Ներկայումս ընթացիկ տարում ստացված մատղաշի հետ միասին հանրապետությունում կա շուրջ 980 հազար հազար գլուխ ոչխար և այծ, որը նախորդ տարվա նույն ժամանակամիջոցի համեմատությամբ ավելի է գրեթե 35 հազարով: Ինչ վերաբերում է արտահանման ծավալներին, Հովհաննիսյանի խոսքով, այո, ընթացիկ տարում ցածր են, քան նախորդ տարվա նույն ժամանակահատվածում: Դա, մեր զրուցակցի խոսքով, պայմանավորված է այն հանգամանքով, որ այս տարվանից մեր հանրապետությունից արտահանում են ոչ թե կենդանի ոչխարներ, այլ համապատասխան պայմաններում սպանդի ենթարկված ոչխարի միս: «Ներկայումս ոչխարի մորթ է իրականացնում միայն Սյունիքի մարզում գործող սպանդանոցը, որտեղ այս տարվա հուլիսի 28-ի դրությամբ իրականացվել է շուրջ 9 հազար գլուխ ոչխարի մորթ: Միսը հիմնականում արտահանվել է Իրանի Իսլամական Հանրապետություն: Ի դեպ, ընթացիկ տարվա 7 ամիսների ընթացքում մսի համար իրացվել են 237,5 հազար գլուխ մանր եղջերավոր կենդանիներ, որի 96%-ը սպառվել է ներքին շուկայում»,- ասաց Հովհաննիսյանը՝ հավելելով, որ մսի իրացման նպատակով հանրապետությունում տարեկան սպանդի է ենթարկվում ավելի քան 500 հազար գլուխ ոչխար, և մինչև տարեվերջ սպանդի կենթարկվի ևս 260-270 հազար գլուխ: «Ակնկալվում է, որ նշված գլխաքանակից 160-170 հազար գլուխը կիրացվի արտաքին շուկայում»:
Ինչ վերաբերում է Թամոյանի նշած հիվանդության՝ Հովհաննիսյանն ասաց, որ ինքը նման տեղեկություն չունի, և դա իրենց իրավասությունների շրջանակում չէ:
