Սպիտակ տանը տրված մամլո ասուլիսի ժամանակ Բարաք Օբաման ուղիղ դիմել է Սիրիայի նախագահին. «Այսօր ես ցանկանում եմ, որպեսզի Ասադին և նրա կողմնակիցներին պարզ լինի, որ աշխարհը հետևում է իրենց: Քիմիական զենքի գործածումն անընդունելի կլինի: Եթե թույլ տաք այդ ողբերգական սխալը, ապա ստիպված կլինեք դիմակայել հետևանքներին և կկրեք դրանից բխող պատասխանատվությունը»:
Ավելի վաղ Օբաման ասել էր, որ դեռ հրաման չի տվել Սիրիայում ռազմական միջամտության մասին, սակայն քիմիական զենքի կիրառումը կհանդիսանա այն «կարմիր գիծը», որից անցնելը կարող է փոխել իր ծրագրերը:
Փորձագիտական զեկույցների համաձայն՝ սիրիական իշխանությունները քիմիական զենքի արտադրությամբ հետաքրքրվել են դեռ 1973 թվականից: Սիրիայի առաջին մատակարարը Եգիպտոսն էր, այնուհետև՝ 1979 թ. հետո Խորհրդային Միությունը: Հետախուզական տվյալների համաձայն՝ 1983 թ. Սիրիան արաբական աշխարհում ամենամեծ քանակությամբ քիմիական զենքն ուներ, սակայն չուներ դրա արտադրության հնարավորությունը:
Սիրիական քիմիական զենքի զգալի մասը իպրիտով ականներ են, որոնք ազդում են մաշկի վրա, սակայն վերջերս Սիրիայի ռազմական իշխանություններն ավելի շատ կենտրոնացել են զարինի և VX-ի վրա, որոնք ազդում են նյարդային համակարգի վրա:
Սիրիայում իրադրությունն ավելի է թեժանում: Արդեն ինը երկրներ Սիրիայի ժողովրդի օրինական ներկայացուցիչ են ճանաչել սիրիական ընդդիմության ազգային կոալիցիային:
