Եթե Լևոն Հայրապետյանը մնա մեկուսարանում, ապա նրա առողջության հետ անդառնալի բան կկատարվի: Մենք արդեն Մոսկվա ենք ուղարկել նրա հիվանդության պատմությունը, սակայն նրա գործում առայժմ ոչ մի փոփոխություն չկա: Այս մասին Լևոն Հայրապետյանի առողջության կտրուկ վատթարացման հետ կապված հայտարարել է նրա բժիշկը՝ բժշկագիտության դոկտոր-պրոֆեսոր Հենրիխ Բակունցը:
Բժշկի խոսքով՝ Հայրապետյանը քաղցկեղով հիվանդ է, նա անոթների հիվանդություն ունի, ինֆարկտ է տարել, կաթված, շաքարախտ ունի, ստենդավորում է անցել:
«Լևոն Հայրապետյանին բանտային պայմանները հակացուցված են. այսպիսի հիվանդները չպետք է բանտում մնան: Նա ամեն ժամ դեղորայք է ընդունում, և եթե ռեժիմը խախտվի, ապա դա նրա առողջության վրա շատ վատ կանդրադառնա»,- հայտարարել է նա:
Լևոն Հայրապետյանի առողջությունը նախօրեին կտրուկ վատացել է: Այս մասին է հայտարարել Հայրապետյանի ընկերը՝ Արամայիս Օհանյանը, որն իր հերթին այդ տեղեկատվությունը ստացել է մեկուսարանից:
«Լևոնը հոգեպես ճնշված վիճակում է, և դա ծայրահեղ վատ է ազդում նրա ինքնազգացողության վրա»,- հաղորդել է Օհանյանը՝ ավելացնելով, որ Հայրապետյանը մի քանի հիվանդություններով է տառապում, այդ թվում՝ քաղցկեղով:
