Շաբաթ օրը՝ դեկտեմբերի 1-ին, ՆԺԿ ակտիվը վերահաստատել է կուսակցության 2011թ. դեկտեմբերի 2-ին կայացրած որոշումը: ՆԺԿ ակտիվը որոշել է առաջիկա նախագահական ընտրություններում առաջադրել ՆԺԿ ղեկավար Արամ Կարապետյանին` վերջնական որոշումը, սակայն, թողնելով նրան: Արամ Կարապետյանը երկար սպասեցնել չի տվել` որոշել է բոյկոտել գալիք նախագահական ընտրությունները: Այս մասին ՆԺԿ ղեկավար Արամ Կարապետյանն ասաց «Առաջին լրատվական»-ի հետ զրույցում:
Նա տեղեկացրեց, որ հավաքելու է առաջադրման համար անհրաժեշտ բոլոր փաստաթղթերը` նորմալ ընտրությունների դեպքում առաջադրվելիս իրավական հարցերի վրա ժամանակ չծախսելու համար, սակայն գալիք ընտրություններին չի առաջադրվելու: Նրա համոզմամբ՝ գալիք ընտրություններին մասնակցելը նշանակում է լեգիտիմացնել ՀՀ գործող նախագահ Սերժ Սարգսյանի ընտրությունը:
«Ես արդեն որոշել եմ չմասնակցել, որովհետև կուսակցությունն ինձ այդ իրավունքը տվել է: Կարծում եմ` բոյկոտը շատ արդյունավետ և հրաշալի միջոց է` ցույց տալու, որ ՀՀ-ում ընդհանրապես ընտրություն գոյություն չունի: Եթե եղած բոլոր նորմալ թեկնածուները բոյկոտեն ընտրությունները, իշխանությունը կունենա անմրցունակ ընտրություններ. սա խնդիր կդառնա ապագայի համար: Հայաստանում պետք է ցույց տալ, որ «ընտրություն» հասկացություն գոյություն չունի, երբ Սերժ Սարգսյանն աշխարհին համոզում է, թե Հայաստանում ամեն անգամ էլ ավելի ժողովրդավար ընտրություններ են կայանում»,- մեկնաբանեց իր տեսակետը Արամ Կարապետյանը:
Նրա խոսքով` ընդդիմությունը մասնակցում է ընտրություններին` իմանալով, որ պարտվելու է, հետո սկսում է գոռալ` «խախտեցին»:
ՆԺԿ ղեկավարը նաև նշեց, որ հանդես կգա գալիք ընտրությունները բոյկոտելու կոչով: «Ես չգիտեմ` իմ կոչին կմիանա՞ն, թե՞ ոչ: Ես նման կոչ արել եմ նաև խորհրդարանական ընտրություններից առաջ, սակայն մասնակցեցին ընտրություններին, մտան խորհրդարան, բայց շատերը չեն էլ բարեհաճում խորհրդարան գալ»,- նկատեց Արամ Կարապետյանը:
Անդրադառնալով ներքաղաքական ներկայիս իրողություններին՝ ՆԺԿ ղեկավարն ասաց, որ քաղաքական դաշտը կաթվածահար է եղել այն ուժերի համար, որոնք սպասում են «Բարգավաճ Հայաստան»-ի որոշմանը: «Ով սպասում է` թող սպասի: Ես առաջին անգամ եմ տեսնում, որ մի քաղաքական ուժ մեկ այլ ուժի որոշմանը սպասի: Սա էլ նոր բան է Հայաստանում: Գագիկ Ծառուկյանը սպասում է Պուտինի, Պուտինը` Պան Գի Մունի որոշմանը: Սա պարադոքս է ու զավեշտ»,- կատակով եզրափակեց ՆԺԿ ղեկավար Արամ Կարապետյանը:
