Պենտագոնն ու ԱՄՆ հետախուզական ծառայությունը ծրագրեր են մշակում Ուկրաինային տեղեկացնելու «երկիր-օդ» հրթիռների տեղակայման մասին՝ կիրակի հաղորդել է New York Times թերթը:
Հաղորդվում է, որ պետքարտուղար Ջոն Քերին առաջարկել է Ուկրաինային փոխանցել ԱՄՆ հետախուզության տեղեկությունները անջատողականների հրթիռների տեղակայման մասին, որպեսզի Ուկրաինան հետագայում կարողանա ոչնչացնել դրանք:
Ինչպես հայտարարել է ամերիկացի պաշտոնյաներից մեկը՝ դա տեխնոլոգիապես բարդ խնդիր չէ, սակայն առկա է ռուսների հետ հարաբերությունների սրացման հարցը, և խնդիրն այն է, թե որքանո՞վ է դա խելամիտ: Պենտագոնում այժմ վեճեր են ընթանում նման քայլի անհրաժեշտության շուրջ: Այդ առաջարկը դեռ չի հասել նախագահին:
«Վեճերն ընթանում են այն հարցի շուրջ, թե որքանով է հնարավոր օգնել Ուկրաինային՝ առանց Ռուսաստանին հրահրելու»,- թերթը մեջբերում է ամերիկյան պաշտոնյայի խոսքերը:
Թերթի տեղեկություններով՝ ԱՄՆ Կոնգրեսում հնչում են նաև Ուկրաինային զենք, ռազմական մեքենաներ մատակարարելու և զինվորականներին ուսուցանելու կոչեր:
