Ներկայացուցիչների պալատի ֆինանսական ծառայությունների հարցերի հանձնախմբի նախագահ հանրապետական Ջեբ Հենսարլինգը Բարաք Օբամային նամակ է հղել, որով կոչ է արել դադարեցնել ռուսական ընկերությունների հետ համագործակցությունը, որն իրականացվում է ԱՄՆ Արտահանման-ներմուծման բանկի միջոցով, գրում է The Hill-ը:
Բարաք Օբամային, պետքարտուղար Ջոն Քերիին և վարչակազմի այլ ներկայացուցիչներին հղված փաստաթղթում Հենսարլինգը հայտարարում է այն մասին, որ, իր կարծիքով, «Ռուսաստանի գործողությունները դեմ են ԱՄՆ ազգային շահերին», միաժամանակ ռուս գործարարները շարունակում են Նահանգներում եկամուտ ստանալ:
«Մի կողմից, վարչակազմը հայտարարել է ռուսական ընկերությունների դեմ պատժամիջոցների մասին, մյուս կողմից՝ հնարավորություն է տալիս ռուսական ընկերություններին շահութաբեր պայմաններով գործարքներ կատարել Արտահանման-ներմուծման բանկի միջոցով»,- հայտարարել է քաղաքական գործիչը:
Նրա խոսքերով՝ ՌԴ-ի որոշ վարկային կազմակերպություններ, որոնք հայտնվել են ԱՄՆ-ի պատժամիջոցների ցուցակում, շարունակում են գործել Ex-Im բանկի միջնորդությամբ:
Քաղաքական գործիչը կոչ է արել Օբամային «անմիջապես դադարեցնել Ex-Im բանկի և ռուսական ընկերությունների համագործակցությունը, ինչպես նաև բացառել Ռուսաստանի մասնակցությամբ Ex-Im-ի գործարքներն ապագայում»:
The Hill-ի տվյալներով՝ Հենսարլինգը Ex-Im բանկի ոխերիմ հակառակորդն է և դեմ է այս վարկային կազմակերպության լիազորությունների երկարացմանը, որը լրանում է ընթացիկ տարվա սեպտեմբերի 30-ին:
