«Հանս Քրիստիան Կոֆոեդ» հայ-դանիական բարեգործական հիմնադրամի անօթևանների կենտրոնում 4 զույգ ամուսնացել է: Զույգերը այդտեղ են ծանոթացել, հետագայում որոշել են ամուսնանալ, աշխատանք գտնել ու վարձով բնակարանում ապրել:
Անդրանիկ Եղիազարյանը ևս այստեղ է ամուսնացել՝ 2 տարի առաջ: Ասում է՝ մինչ սիրելիին գտնելը կարծում էր, թե կյանքը իմաստ չունի, իսկ ինքն էլ կործանված է: Հետո կենտրոնում տեսել է Կարինեին, ամուսնացել, աշխատանք գտել, տեղափոխվել են վարձով բնակարան, սակայն հետո ստիպված են եղել վերադառնալ ու տանիք խնդրել: Հիմա կենտրոնում առաձին հատկացված տարածք ունեն, որն իրենց համար բնակարան է: Միայն թե կինը լուրջ առողջական խնդիրենր ունի՝ շաքարային դիաբետ, ուռուցք, հաճախում է քիմիաթերապիայի կուրսերի, ինչը թանկ է, թեպետ պետպատվերով կես գինն է վճարում: Դեղորայքը հիմնականում Հայաստանից չեն ձեռք բերում, դրանք այստեղ չկան: «Դեղերը շատ թանկ են, ճառագայթումը՝ առավել ևս: Մեկ անգամ անցել եմ բարերարների օգնությամբ, հիմա էլ է անհրաժեշտ, բայց գումար չկա, շատ-շատ թանկ է»,- ասաց Կարինե Եղիազարյանը:
Ամուսինը՝ Անդրանիկը, շինարարությունում է աշխատում, ամբողջ գումարը կնոջ դեղերի համար է ծախսում՝ հույսով, որ հիվանդությանը ևս կհաղթեն: Ամուսինները անելանելի վիճակում գտնվող բոլոր մարդկանց, անօթևաններին խորհուրդ են տալիս միշտ պայքարել՝ «միայն ապրել՝ դա մի ուրիշ աշխարհ է»:
Առավել մանրամասն՝ տեսանյութում:
