Վրացական լրատվամիջոցների պնդմամբ՝ սեպտեմբերից Վրաստանը բարդացնելու է օտարերկրացիների մուտքի վիզայի տրամադրման գործընթացը: Չի բացառվում, որ սրան զուգահեռ՝ որոշ երկրների դեպքում վիզային ռեժիմ սահմանվի՝ պայմանավորված այն հանգամանքով, որ Վրաստանը վավերացնում է Եվրոպական միության հետ Ասոցացման համաձայնագիրը:
Խոսակցություններ կան այն մասին, որ Հայաստանի դեպքում գործելու է մասնակի վիզային ռեժիմ: «Ռեգնում» գործակալության փոխանցմամբ՝ Հայաստանի այն քաղաքացիները, ովքեր Վրաստան կայցելեն հանգստի նպատակով, կօգտվեն այժմ գործող ոչ վիզային ռեժիմից, իսկ ովքեր Վրաստան կայցելեն երկար ժամանակով՝ աշխատելու կամ սովորելու, նրանց համար կգործի վիզային նոր ռեժիմը։ Իսկ թե հատկապես որ երկրների դեպքում կգործի վիզային ռեժիմ՝ դեռևս չի հստակեցվում, քանի որ Վրաստանի ԱԳ նախարար Մայա Փանջիկիձեի խոսքով՝ պետք է մշակվի Վրաստանի միգրացիոն քաղաքականությունը, և ներկայումս Վրաստանը աշխատում է վիզաների ստացման նոր կանոնների, գների վրա:
Սակայն օրերս ՀՀ ԱԳ նախարարությունը հաղորդեց, որ Թբիլիսիում ՀՀ դեսպանության հարցմանն ի պատասխան՝ Վրաստանի ԱԳՆ-ից հաղորդել են, որ Վրաստանը մտադիր չէ Հայաստանի հետ մուտքի արտոնագրային (վիզային) ռեժիմ մտցնել: Այնուամենայնիվ, չեն դադարում մտավախությունները, որ Վրաստան մուտք գործելու առանց վիզային ռեժիմը կփոխվի Հայաստանի քաղաքացիների համար:
«Առաջին լրատվական»-ի հետ զրույցում «Վրացական երազանք» խմբակցության պատգամավոր Ռուսլան Պողոսյանն ասաց, որ ընդհանրապես նման հարց դրված չէ: Ըստ նրա՝ այս պահի դրությամբ որևէ հիմք չունի ասելու, թե Հայաստանի հետ կլինի վիզային ռեժիմ: Պողոսյանի խոսքով՝ Սերժ Սարգսյանի՝ Թբիլիսի կատարած այցի ընթացքում երկու կողմերը մեկ անգամ ևս ընդգծեցին, որ Հայաստանի անդամակցությունը ՄՄ-ին, իսկ Վրաստանի կողմից ԱՀ վավերացումը ավելի են խորացնելու երկու երկրների հարևանությունը ինչպես տնտեսական, այնպես էլ մշակութային ու բազմամյա պատմական հարաբերությունների առումով, դա չի խոչընդոտելու հարաբերություններին:
«Ուստի որևէ մեկը չի պատրաստվում վերանայել այդ հարաբերությունները, և, բնականաբար, մենք պետք է ամեն ինչ անենք, որ այդ հարաբերություններն էլ ավելի խորանան: Մեկ անգամ ևս ընդգծեմ՝ դա տեղի է ունենալու բոլոր ոլորտներում:
«Առաջին լրատվական»-ի հետ զրույցում Ջավախքի շրջանային ժողովի պատգամավոր Ֆյոդոր Թորոսյանն ասաց, որ ընդհանրապես առաջին անգամ է լսում Հայաստանի ու Վրաստանի միջև նախատեսվելիք վիզային ռեժիմի մասին: Նա նշեց, որ տեսականորեն կարելի է ենթադրել, որ կարող է մտցվել վիզային ռեժիմ Հայաստանի ու Վրաստանի միջև, քանի որ Հայաստանը միանում է եվրասիական ինտեգրացիոն պրոյեկտներին, իսկ Վրաստանը վավերացնում է ԱՀ-ն: «Բայց մինչ այս պահը նման տեղեկատվություն չի հասել ժողովին. նման բան եթե լիներ, ինչ-որ կերպ մենք պետք է որ տեղեկացված լինեինք ու սկսեինք քննարկումներ դրա շուրջ»,- ասաց նա:
Հիշեցնենք, որ Վրաստան մուտք գործելու համար նախկին ԽՍՀՄ երկրների՝ Հայաստանի, Մոլդովայի, Ուկրաինայի, Ադրբեջանի, Տաջիկստանի, Ղազախստանի, Ուզբեկստանի համար գործում է առանց վիզայի ռեժիմ:
