Սփյուռքի մտավորականներն այն կարծիքին են, որ ՀՀ առաջիկա նախագահական ընտրություններին մասնակցող հիմնական ուժերը սփյուռքի հետ հարաբերություններ՝ որպես այդպիսին չունեն:
Ֆլորենցիայում բնակվող հայազգի քանդակագործ Վիգեն Ավետիսն «Առաջին լրատվական»-ի հետ զրույցում նշեց, որ Հայաստանը 1991-92թթ. թեև թվում էր, որ պետք է սփյուռքի հետ հարաբերություններ հաստատելու ուղղությամբ գնար, սակայն մեկուսացվեց սփյուռքից, և մինչև այսօր շարունակվում է այդ օկուպացիան: Ըստ նրա՝ Հայաստանի քաղաքական դաշտը օկուպացրեց Հայաստանը սփյուռքից: Նա նշեց, որ երեք նախագահներին էլ շատ ավելի հարմար էր սփյուռքին կարևորություն չտալը:
Սփյուռքի նախարարությունը և սփյուռքի նախարարը, Վիգեն Ավետիսի խոսքով, ամեն ինչ անում են, որ սփյուռքն ու հայրենիքը հեռանան իրարից: «Սա փաստ է, և այստեղ կշահի այն քաղաքական ուժը, որը կառաջարկի մի նոր բանաձև՝ սփյուռք-Հայաստան կապերի բարելավման ուղղությամբ: Այսինքն՝ պետք է հասկանանք՝ 2012-ին, «սփյուռք» հասկացությունը պետք է ջնջենք մեր միջից, բոլոր հայերին պետք է շնորհվի ՀՀ քաղաքացիություն և ՀՀ քաղաքացիներ պետք է համարվեն բոլոր հայերը աշխարհի տարբեր ծագերում ապրող: Ժամանակն է արդեն այդ անջրպետը ջնջվի մեր իրականությունից»,- հավելեց Վիգեն Ավետիսը:
Ըստ նրա՝ սփյուռքը սպասողական վիճակում է, բայց չի տեսնում համագործակցելու ոչ մի պայման. «Ի՞նչ ձևով սփյուռքահայը կարող է ՀՀ-ի հետ շփվել՝ դրամ ուղարկելո՞վ, բայց նրանք նաև պետք է մասնակցեն ներքաղաքական գործընթացներին՝ սկսած տարբեր ռազմավարություններից, այդ թվում` և՛ մշակութային, և՛ քաղաքական բոլոր ասպարեզներում իրենց դերը պետք է զգան և պարտավորություն վերցնեն իրենց վրա»,- ասաց Վիգեն Ավետիսը:
Ամենամյա հեռուստամարաթոնը, նրա խոսքով, շատ կարևոր երևույթ է՝ անկախ ամեն ինչից, և հարցը գումարը չէ, այլ այն, որ ամբողջ սփյուռքն այդ օրը մտածում է Հայաստանի մասին:
«Ես սփյուռքի նախարարին մի խորհուրդ կտամ, որ օդանավակայանում մի գրասենյակ բացի և ամեն գնացողին սփյուռքի նախարարն անձմամբ գնա և խնդրի, որ Հայաստանը չլքի: Սփյուռքի նախարարը բոլորին ասում է` «Արի տուն», բայց ոչ ոքի չի ասում` մի գնա տնից»,- հավելեց նա:
Այսօր, ըստ նրա, քաղաքական ուժերն ամեն ինչ անում են արտագաղթը շատացնելու համար, հասարակությունը լքում է երկիրը, որովհետև ընդդիմություն չի տեսնում: Իսկ ԲՀԿ-ն էլ, ըստ նրա, ընդդիմադիր ուժ երբեք չի կարող համարվել: Նա այն կարծիքին է, որ Հայաստանի վերջը կլինի, երբ Գագիկ Ծառուկյանի ախրաննիկի մասին պատմող անեկդոտն իրականություն դառնա:
Քաղաքական ուժերը, ըստ նրա, հավասարապես վարկաբեկված են, և հիմա ժամանակն է իրական այլընտրանքի: Հայաստանի քաղաքացիների կողմից վերջերս ձևավորված նախախորհրդարանի գաղափարը Վիգեն Ավետիսը ողջունում և կարծում է՝ Հայաստանում իրական փոփոխությունների համար պետք է պրոցեսներին ներգրավել նաև սփյուռքին: