Իսրայելի արտգործնախարար Ավիգդոր Լիբերմանը Պաղեստինի ինքնավարության ղեկավար Մահմուդ Աբասին մեղադրել է քաղաքական ահաբեկչության մեջ, հաղորդում է Interfax-ը:
Լիբերմանի խոսքերով՝ այն, ինչ անում է Մահմուդ Աբասը՝ քաղաքական ահաբեկչություն է: «Նա հստակ տարանջատված է ՀԱՄԱՍ-ից: ՀԱՄԱՍ-ը զբաղվում է ավանդական ահաբեկչությամբ, ամենօրյա: Դա հստակ տարանջատում է ահաբեկչության երկու ճյուղերի միջև»,-հավելել է Լիբերմանը:
Լիբերմանը նշել է, որ այժմ պաղեստինցիների մեջ կան ադեկվատ այլընտրանքային մարդիկ: «Եթե Մահմուդ Աբասը չտապալվի այսօր կամ վաղը, ապա վաղը չէ մյուս օրն այստեղ կգան ծայրահեղականներ և արդեն նույնիսկ ոչ մուսուլման եղբայրներ »,- ասել է նա:
Միևնույն ժամանակ, Իսրայելի արտգործնախարարը նշել է, որ Պաղեստինի ներքին քաղաքականության անհաջողությունները Աբասը փորձում է փոխհատուցել արտաքին քաղաքականության բեմահարթակում լարվածություն ստեղծելու միջոցով:
Լիբերմանը նաև նշել է, որ Աբասը մի քանի ամիս շարունակ չի կարողացել վճարել իր աշխատակազմի աշխատակիցների աշխատավարձերը, բայց դրա փոխարեն իր համար գնել է ավելի քան 50 միլիոն դոլար արժողությամբ ինքնաթիռ:
Նրա խոսքերով՝ Թել Ավիվը չի պատրաստվում պատժամիջոցներով սպառնալ Պաղեստինին և կատարելու է սահմանված համաձայնությունները:
Ինչ վերաբերում է ԱՄՆ-ին, ապա Լիբերմանը հիշեցրել է, որ Վաշինգտոնը որոշեց դադարեցնել ՅՈւՆԵՍԿՕ-ի ֆինանսավորումը, երբ Պաղեստինը դարձավ այդ կազմակերպության անդամ: Նրա խոսքերով՝ սա նշանակում է, որ կարող է լինել իրավիճակ, որի դեպքում ԱՄՆ-ը կդադարեցնի ՄԱԿ-ի ֆինանսավորումը, որը կազմում է կազմակերպության բյուջեի 28%-ը:
