Կենդանաբանները քաղցրահամ ջրերում ապրող, վերջերս հայտնաբերված ձկան տեսակն անվանել են ԱՄՆ-ի նախագահ Բարաք Օբամայի անունով,- հաղորդում է The Guardian-ը:
Կենդանաբաններ Սթիվ Լեյմանը և Ռիկ Մեյդենը աշխարհին ներկայացրել են ձկան նոր տեսակ՝ Etheostoma obama: Այս տեսակի արու ձկներն ունեն ընդամենը 5 սմ երկարություն, սակայն հիացնում են իրենց գունային երանգավորմամբ:
Ավելի վաղ ԱՄՆ-ի միայն երեք նախագահներ են արժանացել նման պատվի. հանդիպում են ձկներ, որոնք անվանակոչվել են ի պատիվ Բիլ Քլինթոնի, Ջիմի Քարտերի և Թեոդոր Ռուզվելտի: Կենդանաբանների խոսքերով՝ այսկերպ նրանք շնորհակալություն են հայտնում այդ մարդկանց շրջակա միջավայրի պաշտպանության գործում իրենց ներդրումների համար:
Նշենք, որ սա Բարաք Օբամայի անվան հավերժացման առաջին դեպքը չէ: Օրինակ՝ 2008 թ. Օբամայի պատվին անվանափոխվում է Բոգի լեռը՝ Անտիգուայի և Բարբուդայի ամենաբարձր կետը: Մեկ տարի անց Օբաման հայտնվում է ռումինական հրուշակեղենների խանութներում՝ շոկոլադե կրուասանների տեսքով, իսկ նիկարագուական «Օբամա» սիգարները վաճառքի ռեկորդ են սահմանել ի հայտ գալուց անմիջապես հետո:
