ՀՅԴ ներկայացուցիչները կուսակցության առաջարկած 7 կետանոց պլատֆորմի շուրջ հանդիպել են խորհրդարանական բոլոր ուժերի հետ, բացի ՀՀԿ-ից, իսկ դեկտեմբերի 6-ին նախատեսվում է հանդիպում արտախորհրդարանական ուժերի, քաղաքագետների, ՀԿ ներկայացուցիչների հետ՝ պատկերն ամբողջացնելու և վերջնական եզրահանգման գալու համար: «Մեր օրակարգը բխում է իրական ախտաճանաչումից, որպեսզի ունենանք նոր իշխանություն, նոր որակով: Եթե սա չի ընդունվում, ուրեմն մյուս խոսակցությունները կուլիսային են»,- Հանրային հեռուստաընկերության «Հարցազրույց» հաղորդման եթերում ասել է ՀՅԴ Հայաստանի գերագույն մարմնի ներկայացուցիչ Արմեն Ռուստամյանը:
Նա նշել է, որ եթե համախմբում չի լինում, չի լինում նաև ճիշտ մրցակցություն: Համախմբումն էլ հնարավոր է իրենց ներկայացրած 7 կետերի շուրջ: «Այս փուլում եթե պարզ չէ, որ մենք համաձայն ենք, թե ինչ քայլերով են երկիրը փոխելու, հաջորդ փուլն անհնար է, այսինքն, գտնել միասնական թեկնածու, առանց միասնական օրակարգի, անհնար է, լինելու է այն, ինչ եղել է մշտապես»,- ասել է ԱԺ ՀՅԴ խմբակցության ղեկավարը՝ հավելելով, որ համախմբում ՀՅԴ առաջարկած կետերի շուրջ չի նշանակում համախմբում ՀՅԴ–ի շուրջ: Բայց պետք է թեկնածուն լինի այնպիսին, որը կարող է այս կետերն իրականացնել: Իսկ դա կարող է լինել անգամ երկրի ներկայիս նախագահը, եթե ընդունի այդ կետերը. «Եթե թեկնածուի շուրջ համախմբում չեղավ, կնշանակի, որ բոլորը եկել են բանակցությունների՝ մտքում ունենալով իրենց թեկնածուն»:
Արմեն Ռուստամյանը նշել է, որ այս պահին խորհրդարանական համակարգին անցման վերաբերյալ վերապահում ունեն ՀԱԿ-ը և ՕԵԿ-ը, իսկ ՀՀԿ-ն կտրուկ դեմ է: Այսինքն, նրանց թվում է, որ «պետք է գան իշխանության և օգտվեն նախագահական համակարգի բարիքներից»:
Ա. Ռուստամյանը նշել է, որ քաղաքական շահերի կոնյունկտուրայից ելնելով չէ, որ իրենք առաջ են բերել իրենց օրակարգը. Դրա կետերը բոլորն էլ նախկինում ասել են. «Այնպես չէ, որ ասում ենք այդ մասին այսօր՝ ընտրությունների նախաշեմին, որ մեր թեկնածուին առաջ տանենք: Սա նոր բերված օրակարգ չէ, այլ Դաշնակցության կողմից քաղաքական համոզումով ձևակերպված օրակարգ: Ընտրություններին մասնակցել-չմասնակցելն էլ է սրանից կախված: Ի՞նչ ընտրություն, եթե պետք է լինի ձևական: Սա օլիմպիադա չէ, որ մասնակցությունն արդեն կարևոր է»: Բանախոսը նաև ասել է, թե չի բացառվում, որ ՀՅԴ-ն չի մասնակցի ընտրություններին, եթե դրանք լինեն այնպիսին, ինչպիսին ԱԺ ընտրություններն էին: Ամեն ինչ ՀՅԴ-ի համար պարզ կլինի դեկտեմբերի 6-ի ֆորումից:
