Դեռևս հայտնի չէ, թե «Հայաստան» համահայկական հիմնադրամի «Հեռուստամարաթոն 2012»-ի ընթացքում հավաքագրված գումարի 10 %-ը երբ կուղղվի սիրիահայության հրատապ խնդիրների լուծմանը: Այս մասին «Առաջին լրատվական»-ի հետ զրույցում ասաց հիմնադրամի հասարակայնության հետ կապերի բաժնի պատասխանատու Հասմիկ Գրիգորյանը:
Նա նշեց, որ հարցը ավելի հստակ կլինի, երբ Հայաստանում լինի հիմնադրամի գործադիր տնօրեն Արա Վարդանյանը: Հասմիկ Գրիգորյանը նշեց, որ «համահայկական հիմնադրամի 25 տեղական մարմինները տարբեր օրենսդրական դաշտերում են գործում, այսինքն՝ տարբեր ձևով է կանոնակարգվում բարեգործական գործունեությունը, ուստի նրբություններ կան, որոնք այս պահին քննարկվում և հստակեցվում են»: Ըստ նրա՝ տնօրենը կլինի շաբաթվա սկզբին, բայց հստակ պատասխանը՝ երբ գումարը կուղղվի սիրիահայերին, պարզ չէ։
Հարցին, թե ինչպես է որոշվել հանգանակված գումարի 10 %-ը տրամադրել սիրիահայությանը՝ Գրիգորյանն ասաց, որ ՀՀ նախագահի առաջարկով սիրիահայերի աջակցության հարցը դրվեց քննարկման և հոգաբարձուների խորհրդին ներկայացվեց խնդիրը, որոշվեց հանգանակված գումարի 10 տոկոսն ուղղել սիրիահայերին:
Անդրադառնալով հիմնադրամի նպատակային ծրագրերին՝ մեր զրուցակիցը նշեց, որ միշտ ունեցել են այդպիսի ծրագրեր, այս տարի ևս դրանք լինելու են: Ըստ Հ. Գրիգորյանի՝ եթե գումար նվիրաբերած բարերարը չի նշել, որ իր փոխանցած գումարի ինչ–որ մի մասն ուզում է ուղղել սիրիահայերին, ուրեմն այդ գումարը կուղղվի որևէ ծրագրի իրականացմանը՝ բարերարի ցանկությամբ: «Նպատակային ծրագրերը հստակեցվում են բարերարի հետ: Այս փուլում նաև ճշտվում են՝ բարերարները գումարներն ուղղում են հեռուստամարաթոնի ռազմավարակա՞ն ծրագրին, թե՞ որևէ նպատակային ծրագիր են ուզում իրականացնել»,- իր խոսքը եզրափակեց Հասմիկ Գրիգորյանը:
Հիշեցնենք, որ «Հեռուստամարաթոն 2012»-ի արդյունքում հավաքագրվել է 21 422 477 ԱՄՆ դոլարի նվիրատվություն և նվիրատվության խոստում: Ինչպես ավելի վաղ հայտնի էր դարձել, այս տարի հանգանակված գումարի 10 %-ը կուղղվի սիրիահայության հրատապ խնդիրների լուծմանը:
