Եգիպտոսի նախագահ Մուհամմադ Մուրսին ծավալուն հարցազրույց է տվել ամերիկյան Time պարբերականին, որում ներկայացրել է երկրում, տարածաշրջանում և աշխարհում տիրող իրավիճակի մասին իր տեսությունը: Ի թիվս այլ հարցերի՝ պետության ղեկավարը պարզաբանել է իր դիրքորոշումը իր աճող իշխանության դեմ արդեն մեկ շաբաթ շարունակվող բողոքի ցույցերի նկատմամբ:
«Մենք տեսնում ենք, որ մարդիկ արտահայտում են իրենց կարծիքը: Հավաքվում են մեծ թվերով, ինչը լավ է: Դա դրական նշան է: Սակայն բռնություն չկա»,- ասել է նախագահը: Նրա խոսքերով՝ պետության ղեկավարը պարտավոր է միջամտել իրադրությանը, եթե «ինչ-որ մեկը» փորձում է դեմ գնալ մեծամասնությանը և խարխլել կայունությունը: «Նավակ ճոճելը ոչ մեկի օգտին չի լինի: Ճիշտ հակառակը»,- ասել է Մուրսին:
Նրա խոսքերով՝ իր նոր լիազորությունների դեմ Կահիրեում և այլ քաղաքներում բողոքող ցուցարարները երկրի բնակչության ընդամենը մի քանի տոկոսն են կազմում: Ընդ որում, Մուրսին նշել է, որ անգամ այդ մի քանի տոկոսը զուր ժամանակ են վատնում, քանի որ շուտով ինքը կհրաժարվի իր լայն լիազորություններից: Նախագահը բացատրել է, որ Եգիպտոսում իշխանության իրական բաժանմանը կվերադառնան նոր սահմանադրության ընդունումից և խորհրդարանական ընտրություններից հետո: Նրա հաշվարկներով՝ դա տեղի կունենա առաջիկա մի քանի ամիսներին:
Հիշեցնենք, մեկ շաբաթ առաջ Մուրսին ստորագրել էր դեկրետ, որի համաձայն իր կարգադրությունները և հրահանգները դուրս են գալիս դատական իշխանության իրավասությունից: Քանի որ երկրի խորհրդարանը ցրվել էր դրանից առաջ, երկրի նախագահը դրանով ստանում է անսահմանափակ իշխանություն:
Մուրսիի այդ դեկրետը երկրում հանգեցրել է զանգվածային ցույցերի, որոնց մասնակիցները պահանջում են վերականգնել իշխանության բաժանումը: Մուրսիի դեմ հանդես են եկել մի շարք հասարակական և քաղաքական կազմակերպություններ, արհմիություններ, իսկ դատավորներն ու դատախազները գործադուլ են հայտարարել: Նախագահը սակայն հայտարարում է, որ իր ընդլայնված լիազորություններից չի պատրաստվում հրաժարվել: Ակնկալվում է, որ այդ հարցում առավել մանրամասն Մուրսին իր դիրքորոշումը կհայտնի ժողովրդին ուղղված հեռուստաուղերձում՝ այսօր ավելի ուշ:
Հարկ է նշել, որ Եգիպտոսի նախկին նախագահ Հոսնի Մուբարաքը նույնպես հայտարարում էր, որ իրեն դեմ է բնակչության միայն փոքր տոկոսը, որոնք «ճոճում են նավակը» դրսի հրահանգով:
