Հայ ազգային կոնգրեսն այսօր որոշել է դիմել Սահմանադրական դատարան` խորհրդարանական կառավարման մոդելին ու 100 տոկոս համամասնական ընտրակարգին անցնելու հարցով չորս խմբակցությունների հրավիրած արտահերթ նիստը ՀՀԿ-ի ու ՕԵԿ-ի կողմից տապալելու առթիվ:
ՀԱԿ-ում պնդում են, որ խախտվել է Սահմանադրության 70-րդ հոդվածը, որը պատգամավորներին հնարավորություն է տալիս գումարել Ազգային ժողովի արտահերթ նիստ՝ «նախաձեռնողի սահմանած կարգով և ժամկետներում»։
Մեր ունեցած տեղեկություններով` ՀԱԿ անդամներն արդեն վերցրել են ՍԴ դիմելու ձևաթուղթը և անհրաժեշտ 27 ստորագրություններն են հավաքում:
Արտահերթ նիստ հրավիրած չորս խմբակցություններից ՍԴ դիմելու ՀԱԿ-ի նախաձեռնությանը այս պահի դրությամբ կմիանա միայն «Ժառանգությունը»:
««Ժառանգություն» կուսակցությունն ամենայն հավանականությամբ կմիանա ստորագրահավաքին»,- «Առաջին լրատվական»-ի հետ զրույցում ասաց «Ժառանգության» փոխնախագահ Արմեն Մարտիրոսյանը:
ՀՅԴ-ից արդեն հայտարարել են, որ իրենք չեն միանալու ՀԱԿ-ի նախաձեռնությանը, քանի որ ավելի նպատակահարմար են գտնում իրենց նախաձեռնությունը: Նշենք, որ երեկ այդ հարցով ՀՅԴ-ն դիմել է ԱԺ էթիկայի հանձնաժողով: Չի բացառվում, որ դա արվել է ՀԱԿ-ի նախաձեռնությանը չմիանալու համար:
ԲՀԿ-ն դեռ չի կողմնորոշվում` միանա՞, թե՞ ոչ: Փաստորեն ԲՀԿ-ում այս առթիվ ևս չկողմնորոշված իրավիճակ է:
