Ամերիկյան Profiles in History աճուրդի տունը աճուրդի է հանում հանրահայտ մարդկանց այդ թվում՝ լեգենդար The Beatles խմբի առաջնորդ Ջոն Լենոնի, հոլանդացի նկարիչ Վինսենտ Վան Գոգի, ԱՄՆ առաջին նախագահ Ջորջ Վաշինգտոնի և ռուս մեծ կոմպոզիտոր Պյոտր Չայկովսկու նամակները: Այս մասին հայտնում է ITAR-TASS-ը:
Ինչպես սպասվում է, բրիտանացի ռոք երաժիշտ Էրիկ Կլեպտոնին ուղղված Լենոնի նամակի սևագիր տարբերակը կվաճառվի 20-30 հազար դոլարով: 1971թ. սեպտեմբերի 29-ին թվագրված այդ 8 էջանոց ձեռագիր ուղերձում «լիվերպուլյան քառյակի» առաջնորդը իր հիացմունքն է արտահայտել Կլեպտոնի տաղանդի հանդեպ և առաջարկել նրան խումբ ստեղծել: Նամակի վերջնական տարբերակի գտնվելու վայրը հայտնի չէ:
Աճուրդի տան ներկայացուցիչների խոսքով՝ ևս մեկ թոփ լոտ կդառնա Վան Գոգի նամակը, որը գրվել է 1890 թվականին և ուղղված է Ֆրանսիայի Առլ քաղաքի Café de la Gare սրճարանի սեփականատեր ամուսիններին: Հենց այդ սրճարանում էլ սիրում էր լինել նկարիչը: 4 էջանոց ուղերձում Վան Գոգը մադամ Ժինուին շուտափույթ ապաքինում է մաղթել: Նամակի մեկնարկային գինը 200-300 հազար դոլար է:
Ջորջ Վաշինգտոնի նամակն ուղղված է եղել անգլիկան հոգևորական Ջոնաթան Բաուչերին, գրվել է 1798 թվականի օգոստոսի 15-ին՝ ԱՄՆ-ի և Ֆրանսիայի միջև չհայտարարված ծովամարտի ամենաթեժ պահին: Նամակում ԱՄՆ նախագահը իր երախտագիտությունն է հայտնում իրեն ուղարկված «Հայացք ամերիկյան հեղափոխության հետևանքներին և պատճառներին» գրքի համար, որում հոգևորականի 13 քարոզ էր ներառված: Ինչպես սպասվում է՝ Վաշինգտոնի ձեռագիր նամակը նույնպես 200-300 հազար դոլարով կվաճառվի:
Իսկ ահա Չայկովսկու նամակն ուղղված է եղել իր մոտ ընկեր, ռուս երաժշտության և գրականության քննադատ Հերման Լարոշին: Նրանում Չայկովսկին իր կարծիքն է արտահայտել Լարոշի ուվերտյուրաների մասին: Մեկնարկային գինը 10-15 հազար դոլար է:
Դեկտեմբերի 18-ին կայանալիք աճուրդում կներկայացվեն ավելի քան 300 պատմական փաստաթղթեր: Դրանցում են նաև Լուի Պաստերի, Զիգմունդ Ֆրեյդի, Չարլզ Դարվինի, Մարի Կյուրիի, Ջուզեպպե Վերդիի, թագավորներ Հենրիխ II-ի և Նապոլեոն I-ի նամակները:
Այս աճուրդը առաջիկա երկու տարվա ընթացքում անցկացվելիք աճուրդների շարքից առաջինն է: Ընդհանուր առմամբ աճուրդի կհանվի շուրջ 3000 պատմական փաստաթուղթ:
