Լեռնային Ղարաբաղի Հանրապետության արտաքին գործերի նախարար Կարեն Միրզոյանն այսօր ասել է, որ «անհրաժեշտ է ջանքեր գործադրել խաղաղ կարգավորման գործընթացը անշրջելի դարձնելու ուղղությամբ, ինչպես նաև կոնկրետ միջոցներ ձեռնարկել հրադադարի ռեժիմի ամրապնդման ուղղությամբ»:
Ինչպես հաղորդում է Մեդիամաքս-ը, այդ մասին նա ասել է, հանդես գալով Երևանում «Տարածաշրջանային անվտանգության դինամիկան Հարավային Կովկասում» միջազգային ֆորումի ժամանակ:
Կարեն Միրզոյանն ասել է, որ ԵԱՀԿ Մինսկի խմբի համանախագահության ներկայիս միջնորդական ձևաչափի ներուժը սպառված չէ: Միաժամանակ նա հավելել է, որ անհրաժեշտ է ապահովել Ստեփանակերտի լիարժեք մասնակցությունը բանակցային գործընթացին:
ԼՂՀ ԱԳ նախարարը շեշտել է, որ Ադրբեջանը շարունակում է ռազմական սպառնալիքների, ուժային ճնշման և ահաբեկման վրա հիմված իր ավանդական վարքագիծը:
«Բաքուն նաև կոպտորեն խախտում է իր բնակչությունը խաղաղության նախապատրաստելու ստանձնած պարտավորությունը», – ասել է Կարեն Միրզոյանը:
Նշելով, որ ԼՂՀ-ն կայացած պետություն է, Կարեն Միրզոյանը շեշտել է, որ ԼՂՀ-ի ներկայիս կարգավիճակը չպետք է խոչընդոտ հանդիսանա համագործակցության համար:
«Տարածաշրջանում ցանկացած անվտանգության մոդել պետք է հաշվի առնի Լեռնային Ղարաբաղի գործոնը», – եզրափակել է ԼՂՀ-ի արտաքին գերատեսչության ղեկավարը:
