Նույնականացման քարտը այն նախադուռն է, որից հետո քարտում տեղադրված չիպը մտնելու է մարդու մարմնի մեջ. այսօր լրագրողների հետ հանդիպման ժամանակ այս մասին ասաց «Քրիստոնյաներն ընդդեմ մարդկանց համարակալման» միավորման նախագահ Խաչիկ Ստամբոլցյանը՝ խոսելով նույնականացման քարտերի մասին:
Նա նշեց, որ արդեն երկրորդ փուլում ենք, որտեղ նույնականացման քարտն է ուժի մեջ մտնելու: Բանախոսը պատմեց, որ օրենք կազմողների հետ իր ղեկավարած միությունը բանակցությունների մեջ է եղել, որի արդյունքում ԱԺ-ում հանրային քննարկում է եղել և օրենքն ընդունվել է, ըստ որի՝ մարդիկ նույնականացման քարտ ստանալու են կամավոր սկզբունքով:
«Բայց սեպտեմբերի 13-ին կառավարությունը որոշում ընդունեց, որով իր լիազորությունները գերազանցեց այն դեպքում, երբ ԱԺ որոշումը օրենք է և բարձր է, իսկ կառավարության ենթաօրենսդրական ակտերը չպետք է հակասեն ԱԺ օրենքներին։ Սա հակասության մեջ մտավ ԱԺ որոշման հետ, խորամանկության դիմեցին, որպեսզի հիմնարկի ղեկավարները և հաշվապահները անպայման ստանան նույնականացման քարտը: Այսինքն՝ բոլոր ճանապարհներով գնում են՝ պարտադրելու նույնականացման քարտ:
Շահագրգռում են նաև մարդկանց գումարներով: Եթե մինչև նոյեմբերի 30-ը ՊԵԿ գրանցվեն՝ ստանալու այդ քարտը, բյուջեն է ֆինանսավորում»,- մեկնաբանեց բանախոսը՝ շարունակելով, թե որն է իրենց շահագրգռվածությունը:
Այստեղ, Խ. Ստամբոլցյանի խոսքով, խնդիրն այն է, որ օրենք է խախտվել, անօրինականություն է տեղի ունեցել, ԱԺ ընդունած օրենքն է խախտվել: Նրա համոզմամբ՝ սա համաշխարհային խնդիր է, որի ետևում են կանգնած դիվային մասոնական ուժերը՝ չիպերով ձգտելով կառավարելի դարձնել աշխարհը և ստրկացնել մարդկանց:
