Թերթն այսօր որոշ մանրամասներ է հրապարակել Վրաստանում «լրտեսական գործի» վերաբերյալ: Թերթի փոխանցմամբ, մինչեւ հիմա պաշտոնական մարմինները հրաժարվում են 20 հոգու ձերբակալության վերաբերյալ տեղեկություններ հաղորդելուց:
Սակայն տեղի մամուլը բավականին ակտիվ քննարկում է այս թեման: «Ինտերպեսնյուզը» նշել է այդ ձերբակալվածներից երկուսի անունները: Նրանք են՝ բաթումցի գործարարներ Արմեն Գեւորգյանը եւ Ռուբեն Շիկոյանը: Երկուսն էլ աշխատել են մի ընկերությունում, որը զբաղվել է բեռների փոխադրմամբ: Ասլան Աբաշիձեի իշխախության օրոք Գեւորգյանը տեղի հայ համայնքի ղեկավարն է եղել: Փաստաբան Նանա Ցուլաձեի խոսքերով, երկու գործարարն էլ արդեն դատապարտվել են երկու ամիս կալանքի: Նրանց գործերով քննությունը շարունակվում է: Նույն աղբյուրի պնդմամբ, Աջարիայում եւս 10 հոգի են ձերբակալվել: Հայտնի են նրանցից մի քանիսի անունները, եւ որ նրանք, իբր, տեղեկություններն են հավաքել ռուսական կողմի համար: Նրանք նաեւ հետաքրքրվել են բարձրաստիճան պաշտոնյաներով:
Վրացի փորձագետների կարծիքով, այս սկանդալը չի բխում վրացական կողմի շահերից, քանի որ այն ավելի է բարդացնում առանց այն էլ լարված ռուս-վրացական հարաբերությունները: Ինչպես նշել է «Ազատություն եւ արդարադատություն» ՀԿ-ի ղեկավար Իրակլի Սեսիաշվիլին, «լրտեսների ձերբակալության մասին տեղեկատվության այս արտահոսքը լավագույն գործոնը չեն ռուս-վրացական հարաբերությունների բարելավման համար, եւ ցանկալի կլիներ պարզել, թե որտեղից է եղել այդ արտահոսքը եւ ում է այն ձեռնտու»:
