NASA-ի մասնագետները 2007PA8 աստղակերպի մի շարք ռադարային հետազոտություններ են անցկացրել, երբ այն այս դարաշրջանում վերջին անգամ մոտեցել է Երկրին: Այս մասին հաղորդում է RIA Novosti-ն՝ վկայակոչելով տիեզերական գործակալության հաղորդագրությունը:
Ստացված տվյալները թույլ են տվել չափել աստղակերպի ուղեծիրը, հետազոտել մակերևույթը: Բացի այդ, գիտնականները պարզել են, որ աստղակերպը շատ դանդաղ է պտտվում. այն մեկ ամբողջական պտույտ կատարում է 3-4 օրվա ընթացքում:
Նոյեմբերի 5-ին Գրինվիչի ժամանակով ժամը 16.42-ին երկրային մարմինը նվազագույն հեռավորության վրա՝ 0.043 աստղագիտական միավոր, անցել է Երկրի մոտով: Այս մեծությունը կազմում է 6.48 միլիոն կմ և 16.82 անգամ ավելի մեծ է, քան Երկրից Լուսին եղած հեռավորությունը: Հաջորդ մոտեցումը Երկրին մոտավորապես նույն հեռավորության վրա տեղի կունենա 2122 թ. դեկտեմբերին:
2007PA8 աստղակերպը հայտնաբերվել է 2007 թ. օգոստոսի 9-ին:
