Էլեկտրատեխնիկա արտադրող BSH (Bosch und Siemens) գերմանական ընկերությունը պատրաստվում է ընդլայնվել թուրքական շուկայում: Ընկերության գործադիր տնօրեն Նորբերտ Կլայնը հայտարարել է, որ իրենց նոր կարգախոսն է՝ «Բոլորը գնում են Չինաստան արտադրության համար, իսկ մենք՝ Չինաստանից Թուրքիա»:
Կլայնի հայտարարությունը բխում է նրանից, որ ընկերությունը մտադիր է Թուրքիայի իր մասնաճյուղերում արտադրել մինչ այդ Չինաստանում պատրաստվող տեխնիկան, օրինակ՝ փոշեկուլներ: Միևնույն ժամանակ ընկերության ղեկավարությունը նշում է, որ և՛ Թուրքիայում, և՛ Չինաստանում իրենք հավասարաչափ են ներկայացված, հետևաբար մեկը մյուսին կարող է հակակշիռ լինել:
Ընդհանուր առմամբ, BSH-ը Թուրքիայում ունի մոտ 5000 աշխատակից: Ընդ որում, Չինաստանի համեմատ՝ Թուրքիան առանձնանում է մի շարք առավելություններով: Եթե առաջին երկրում ավելի էժան աշխատուժ ու արտադրական պայմաններ են, ապա թուրքական համալսարանները պատրաստում են ավելի որակյալ մասնագետներ: Օրինակ՝ սառնարաններն արտադրվում են միայն Թուրքիայում:
Վերջին տարիներին Bosch und Siemens-ն իրենց թուրքական արտադրամասերում կատարել են մոտ 1,2 մլրդ ներդրում: Ընկերության վերջին ընդլայնումն արժեցել է 300 մլն դոլար: Ղեկավարության հայտարարության համաձայն՝ թուրքական շուկան 3-րդ տեղում է ընկերության վարկանիշում՝ Գերմանիայից ու Չինաստանից հետո:
