Իսպանիայի Կատալոնիա ինքնավար շրջանում սկսվել է արտահերթ ընտրությունների քվեարկությունը: Նախընտրական արշավը կենտրոնացել էր տարաշածրջանի անկախության մասին հարցի վրա: Հարցումների համաձայն՝ Իսպանիայից Կատալոնիայի անջատման կողմնակիցները քիչ ձայն չեն ստանա:
Ինչպես փոխանցում է BBC-ն, Կատալոնիայում ընտրատեղամասերը բացվել են Գրինվիչի ժամանակով ժամը 7:00-ին (Երևանի ժամանակով ժամը 11:00): 7 մլն կատալոնացիներ կվերընտրեն 135 խորհրդարանականների:
Կատալոնիայի վարչապետ Արթուր Մասի խոսքով՝ իր աջ կենտրոնամետ «Համակցում և միություն» կուսակցությունը մտադիր է նոր խորհրդարանում մեծամասնություն կազմել:
Նախկինում` 2010-ի նոյեմբերին, կուսակցությունը հաղթել էր սոցիալիստներին: Մասը գիտակցում է, որ Կատալոնիայի անկախության հասնելու համար իրեն անհրաժեշտ է ընտրողների հստակ մանդատը: Եթե նա այդպիսին չստանա ընտրություններում, ապա Մասը ստիպված կլինի հենվել փոքր կուսակցությունների աջակցության վրա, որոնք նույնպես հանդես են գալիս տարածաշրջանի անկախության օգտին:
Իսպանիայի սահմանադրության համաձայն` տարածաշրջանի կարգավիճակի մասին հանրաքվեի անցկացումը հակաօրինական քայլ է: Ըստ այդմ` երկրում իշխող Ժողովրդական կուսակցությունը արգելափակում է սահմանադրական բարեփոխումների ցանկացած փորձ:
Տարածաշրջանի այլ խոշոր քաղաքական ուժեր՝ Կատալոնիայի ժողովրդական կուսակցությունը և Սոցիալիստական կուսակցությունը, դեմ են անկախության գաղափարին:
Ավելի վաղ ԵՄ արդարադատության, հիմնարար իրավունքների և քաղաքացիության հարցերով հանձնակատար Վիվիեն Ռեդինգը, ի պատասխան Իսպանիայի ԵՄ հարցերով պետքարտուղար Մենդե դե Վիգոյի նամակի, հաստատել էր, որ Եվրահանձնաժողովի «պաշտոնական դիրքորոշումը» այնպիսին է, որ անկախության ձեռքբերման դեպքում Կատալոնիան կմնա ԵՄ սահմաններից դուրս:
Նշենք, որ անկախ տարաշածրջանը անջատվելու հետևանքով կդառնա երրորդ երկիրը, որի վրա ԵՄ պաշտոնական համաձայնագրերը չեն տարածվի:
Հիշեցնենք, որ սեպտեմբերի 5-ին կատալոնական Սան Պեդրո դե Տորելիո քաղաքի օրենսդիրները հայտարարել էին իրենց տարածքի՝ Իսպանիայի կենտրոնական կառավարությունից անկախանալու մասին: Մեկ ամիս անց Իսպանիայի խորհրդարանը դեմ է քվեարկել որոշմանը, որը թույլ կտար Կատալոնիայի իշխանություններին այդ տարաշածրջանի ինքորոշման մասին հանրաքվե անցկացնել:
Սեպտեմբերի 11-ին Բարսելոնում տեղի ունեցավ Իսպանիայից Կատալոնիայի անջատման կողմնակիցների երթը: Ակցիային մասնակցեց 1.5 մլն մարդ: Շատերն այդ զանգվածային ակցիան դիտարկեցին որպես հարկային փաթեթի վերանայման նպատակով երկրի կառավարության դեմ ուղղված փորձ: Կատալոնացի ազգայնականների կարծիքով` ինքնավար շրջանը Իսպանիայի բյուջե է ներդնում ավելին, քան ստանում է:
Կատալոնիայի խորհրդարանը հանրաքվե է նշանակել նոյեմբերի 25-ին: Արտահերթ ընտրություններ անցկացնելու պատճառ է դարձել տեղական բյուջեում հարկային հատկացումների մակարդակի ինքնուրույն որոշման հարցում կենտրոնական կառավարության մերժումը:
